સીસીટીવી ફૂટેજ મુજબ, લૂંટારૂઓ બપોરે 1:10 વાગ્યે બાઈક પર બેંકની બહાર આવી પહોંચ્યા હતા અને કેશવાનની રાહ જોઈ રહ્યા હતા. બપોરે 2:01 વાગ્યે જ્યારે કેશવાન આવી અને કર્મચારીઓ રૂ. 38 લાખ ભરેલી પેટી લઈને બેંકમાં પ્રવેશ્યા, ત્યારે જ લૂંટારૂઓએ ત્રાટકીને બંદૂકની અણીએ આ રકમ લૂંટી લીધી હતી. આ ઉપરાંત, તેમણે કેશ કાઉન્ટર પરથી બીજા રૂ. 12 લાખની પણ લૂંટ કરી હતી અને ગ્રાહકો તેમજ સ્ટાફના મોબાઈલ ફોન પણ પડાવી લીધા હતા.

આ લૂંટની સૌથી આશ્ચર્યજનક બાબત એ છે કે લૂંટારૂઓ બપોરે 2:06 વાગ્યે લૂંટની રકમ ભરેલા થેલા સાથે બેંકની નીચે ઉભેલા ગનમેનની નજર સામેથી જ પસાર થયા હતા, પરંતુ ગનમેનને ખ્યાલ સુદ્ધા આવ્યો નહોતો. લૂંટારૂઓ પલ્સર, અપાચે અને સ્પ્લેન્ડર જેવા બાઈક પર આવ્યા હતા અને લૂંટ બાદ બિન્દાસ્ત રીતે ફરાર થઈ ગયા હતા. તપાસમાં એવું પણ બહાર આવ્યું છે કે લૂંટારૂઓએ કોઈ પણ બુકાની વગર ખુલ્લા મોઢે આ ગુનાને અંજામ આપ્યો હતો.

પોલીસને શંકા છે કે આ લૂંટારૂઓ સુરતની બહારથી, કદાચ હજારો કિલોમીટર દૂરથી ખાસ આ લૂંટ કરવા માટે આવ્યા હતા. તેમણે આ બેંકમાં લૂંટ કરતા પહેલા સતત 17 દિવસ સુધી દિવસ-રાત રેકી કરી હોવાનું અનુમાન છે. લૂંટારૂઓની મોડેસ ઓપરેન્ડી જોઈને પોલીસ માની રહી છે કે તેઓ પ્રોફેશનલ હોવા છતાં જે રીતે ખુલ્લા મોઢે લૂંટ કરી છે તે જોતા આ તેમની પહેલી મોટી બેંક લૂંટ હોઈ શકે છે.

હાલમાં સુરત પોલીસની વિવિધ ટીમો દિવસ-રાત એક કરીને આરોપીઓને શોધી રહી છે. પોલીસની એક ટુકડીએ મહારાષ્ટ્રમાં પણ ધામા નાખ્યા છે. શહેરની પ્રતિષ્ઠિત બેંકમાં ધોળા દિવસે થયેલી આ લૂંટ પોલીસ માટે એક મોટો પડકાર બની ગઈ છે. સીસીટીવી ફૂટેજમાં લૂંટારૂઓના ચહેરા સ્પષ્ટ દેખાતા હોવાથી પોલીસ વિવિધ ડેટાબેઝ દ્વારા તેમની ઓળખ કરવાના પ્રયાસો કરી રહી છે અને ટૂંક સમયમાં ભેદ ઉકેલાય તેવી આશા છે.