સિટી ન્યુઝ @ સુરેન્દ્રનગર

ઓલ ઇન્ડિયા વાડો કાઈ કરાટે એસોસિયેશન દ્વારા 28 મી નેશનલ કરાટે ચેમ્પિયનશિપનું ભવ્ય અને પ્રતિષ્ઠિત આયોજન હિમાચલ પ્રદેશના પ્રખ્યાત ધર્મશાલા ઇન્ડોર સ્પોર્ટ કોમ્પ્લેક્સ ખાતે કરવામાં આવ્યું હતું. આ પ્રતિષ્ઠિત રાષ્ટ્રીય સ્પર્ધામાં દેશભરના વિવિધ રાજ્યો જેવા કે પશ્ચિમ બંગાળ, વિશાખાપટ્ટનમ, મહારાષ્ટ્ર, ગુજરાત, હિમાચલ પ્રદેશ, આસામ, પંજાબ અને ઓડિશા સહિતના પ્રદેશોમાંથી 600 થી વધુ પ્રતિભાશાળી વિદ્યાર્થીઓએ ભાગ લીધો હતો. સમગ્ર ગુજરાત રાજ્યમાંથી કુલ 162 ઉત્સાહી વિદ્યાર્થીઓ આ મેગા ચેમ્પિયનશિપમાં હરીફાઈ કરવા માટે સામેલ થયા હતા.

ગુજરાત વતી રમેલા આ 162 વિદ્યાર્થીઓમાંથી એકલા સુરેન્દ્રનગર જિલ્લાના 25 જેટલા વીર વિદ્યાર્થીઓએ મેદાન પર અદભુત અને ઉત્કૃષ્ટ પ્રદર્શન કરીને સૌને ચોંકાવી દીધા હતા. સુરેન્દ્રનગરના આ કરાટેબાજોએ કાતા ફોર્મેટમાં શાનદાર રમત દાખવીને 5 ગોલ્ડ, 6 સિલ્વર અને 9 બ્રોન્ઝ મેડલ પોતાના નામે કર્યા હતા. જ્યારે બીજી તરફ ભારે રસાકસીભર્યા કુમિતે એટલે કે ફાઈટ ફોર્મેટમાં પોતાની આક્રમક શૈલી બતાવીને 7 ગોલ્ડ, 9 સિલ્વર અને 5 બ્રોન્ઝ મેડલ મેળવી વિજય પતાકા લહેરાવી હતી.

આમ, સુરેન્દ્રનગરના આ નાનકડા વિસ્તારના વિદ્યાર્થીઓએ નેશનલ કક્ષાએ કુલ 12 ગોલ્ડ, 15 સિલ્વર અને 14 બ્રોન્ઝ મેડલ સહિત કુલ 41 મેડલ જીતીને રાષ્ટ્રીય ફલક પર સુરેન્દ્રનગર જિલ્લાનું નામ ખૂબ જ ગર્વથી રોશન કર્યું છે. સુરેન્દ્રનગર જિલ્લાના મુખ્ય કરાટે કોચ દીપક આર. ચૌહાણે ખેલાડીઓની આ અદભૂૂત અને ઐતિહાસિક સફળતા બદલ દરેક વિજેતા ખેલાડીઓને હાર્દિક અભિનંદન પાઠવ્યા હતા અને રાષ્ટ્રીય સ્તરે ગુજરાતનો દબદબો સ્થાપિત કરવા બદલ ખુશી વ્યક્ત કરી હતી.

આંતરરાષ્ટ્રીય સ્તરે થાઈલેન્ડમાં ભારતનું પ્રતિનિધિત્વ કરશે

નેશનલ કરાટે ચેમ્પિયનશિપમાં જવલંત સફળતા મેળવનારા સુરેન્દ્રનગરના આ તેજસ્વી અને વિજેતા વિદ્યાર્થીઓ હવે આગામી ઓગસ્ટ મહિનામાં આંતરરાષ્ટ્રીય સ્તરે પોતાનો દમ દેખાડશે.આ તમામ ખેલાડીઓ ઓગસ્ટમાં થાઈલેન્ડ ખાતે યોજાનારી ઇન્ટરનેશનલ કરાટે ચેમ્પિયનશિપમાં ભારત દેશનું સત્તાવાર પ્રતિનિધિત્વ કરવા માટે વિદેશ જશે, જે સમગ્ર ગુજરાત માટે ગૌરવપૂર્ણ બાબત છે.