સિટી ન્યુઝ @ સુરત

સુરતના અડાજણ ચાર રસ્તા પાસે આજે સવારે BAPS હોસ્પિટલની નજીક આવેલી દુકાનોમાં ભીષણ આગ ફાટી નીકળતા સમગ્ર વિસ્તારમાં અફરાતફરીનો માહોલ સર્જાયો હતો. પ્રાથમિક તપાસમાં આગની આ ઘટના એક ઇલેક્ટ્રિક વ્હીકલ (EV) શો-રૂમમાંથી શરૂ થઈ હોવાનું સામે આવ્યું છે. ઈલેક્ટ્રિક વાહનોની બેટરી અને અન્ય સ્પેરપાર્ટ્સના કારણે આગ એટલી ઝડપથી પ્રસરી કે તેણે જોતજોતામાં બાજુમાં આવેલી એપોલો ફાર્મસી અને એક પ્રખ્યાત ક્રિષ્ના રેસ્ટોરન્ટને પણ પોતાની ઝપેટમાં લઈ લીધા હતા. આ અગ્નિકાંડમાં 15 થી વધુ વાહનો બળીને ખાખ થઈ ગયા છે.

આગ એટલી પ્રચંડ હતી કે તેના કારણે પેદા થયેલી અસહ્ય ગરમીથી દુકાનોનું મજબૂત લોખંડનું સ્ટ્રક્ચર પણ ઓગળીને નીચે નમી પડ્યું હતું. સ્થિતિની ગંભીરતાને જોતા સ્થાનિકોએ તરત જ ફાયર વિભાગને જાણ કરી હતી. સુરત ફાયર વિભાગે ત્વરિત કાર્યવાહી કરતા પાલનપુર, જહાંગીરપુરા, મોરાભાગળ અને મુગલીસરા સહિતના પાંચ ફાયર સ્ટેશનની 10 થી વધુ ગાડીઓ કાફલા સાથે ઘટનાસ્થળે દોડી આવી હતી. ફાયર ફાઈટરોએ ભારે જહેમત બાદ આગ પર કાબૂ મેળવ્યો હતો અને આગ વધુ ન પ્રસરે તે માટે પાણીનો ભારે મારો ચલાવ્યો હતો.

ડેપ્યુટી ચીફ ફાયર ઓફિસર એસ. ડી. ધોબીએ જણાવ્યું હતું કે, આગ પર હાલ સંપૂર્ણ કાબૂ મેળવી લેવાયો છે અને અત્યારે કુલિંગની કામગીરી ચાલી રહી છે. સદનસીબે આ દુર્ઘટનામાં કોઈ પણ પ્રકારની જાનહાનિ થઈ નથી, પરંતુ લાખો રૂપિયાનો માલસામાન બળીને ખાખ થયો હોવાનું અનુમાન છે. હોસ્પિટલ જેવા ભીડભાડ વાળા વિસ્તારની નજીક હોવા છતાં ફાયર વિભાગની સમયસૂચકતાને કારણે એક મોટી હોનારત ટળી છે. પોલીસે હાલ આ સમગ્ર મામલે તપાસ શરૂ કરી છે.