આ અગાઉ 2 May ના રોજ નાસિકની અદાલતે નિદા ખાનની આગોતરા જામીન અરજી ફગાવી દીધી હતી. પ્રોસિક્યુશને કોર્ટમાં દલીલ કરી હતી કે આરોપોની પ્રકૃતિ અત્યંત ગંભીર છે અને કેસના મૂળ સુધી પહોંચવા માટે આરોપીની કસ્ટડીમાં પૂછપરછ કરવી અનિવાર્ય છે. જામીન ના મંજૂર થયા બાદ નિદા ફરાર થઈ ગઈ હતી, જેને હવે સ્પેશિયલ ઇન્વેસ્ટિગેશન ટીમ (SIT) દ્વારા ઝડપી લેવામાં આવી છે.

FIR ની વિગતો મુજબ, નિદા ખાન પર એવો પણ આરોપ છે કે તેણે ઓફિસમાં કામ કરતી મહિલા કર્મચારીઓને બુરખો પહેરવા માટે દબાણ કર્યું હતું અને તેમની ધાર્મિક ભાવનાઓને ઠેસ પહોંચાડી હતી. આ કેસની તપાસ માટે નાસિક પોલીસ દ્વારા ખાસ SIT ની રચના કરવામાં આવી છે. અત્યાર સુધીમાં આ મામલે વિવિધ મહિલા કર્મચારીઓની ફરિયાદના આધારે કુલ 9 FIR નોંધાઈ ચૂકી છે. આ કેસમાં અત્યાર સુધીમાં ઓપરેશન્સ મેનેજર સહિત 8 લોકોની ધરપકડ કરવામાં આવી છે.

નિદા ખાને કોર્ટમાં પોતાની ગર્ભાવસ્થાનો હવાલો આપીને માનવતાના ધોરણે આગોતરા જામીન મેળવવાનો પ્રયાસ કર્યો હતો, પરંતુ કોર્ટે ગુનાની ગંભીરતાને જોતા તેને રાહત આપવાનો ઇનકાર કર્યો હતો. આ વિવાદ વકરતા TCS કંપનીએ પણ સત્તાવાર નિવેદન જારી કર્યું હતું કે તેઓ કોઈપણ પ્રકારની સતામણી કે અનૈતિક દબાણ વિરુદ્ધ 'ઝીરો-ટોલરન્સ' નીતિ ધરાવે છે અને પોલીસ તપાસમાં પૂર્ણ સહયોગ આપી રહ્યા છે.

આ આખો મામલો ત્યારે પ્રકાશમાં આવ્યો જ્યારે 26 March ના રોજ દેવલાલી કેમ્પ પોલીસ સ્ટેશનમાં પ્રથમ FIR નોંધાઈ હતી. ત્યારબાદ એક પછી એક 8 અન્ય મહિલા કર્મચારીઓ પણ હિંમત દાખવીને સામે આવી હતી. તેમના નિવેદનો પરથી ઓફિસમાં જાતીય શોષણ અને ધાર્મિક લાગણીઓ દુભાવવાની એક ચોક્કસ પેટર્ન હોવાનું SIT ના ધ્યાને આવ્યું છે. નિદા ખાનની ધરપકડ બાદ હવે આ કૌભાંડમાં સંડોવાયેલા અન્ય મોટા માથાઓના નામ સામે આવવાની પણ શક્યતા સેવાઈ રહી છે.