સિટી ન્યુઝ @ નવી દિલ્હી

નવી દિલ્હી, લશ્કર-એ-તૈયબા સાથે સંકળાયેલા ઓપરેટિવ રિઝવાન હનીફે એક સનસનીખેજ દાવો કર્યો છે કે ૨૦૨૦થી પાકિસ્તાનના ઘણા મોટા શહેરોમાં ભારતીય એજન્ટોએ ઘૂસણખોરી કરી છે અને ૩૦થી વધુ આતંકવાદીઓને મોતને ઘાટ ઉતારી દીધા છે. પાકિસ્તાન નિયમિતપણે ભારત વિરુદ્ધ કાવતરાં રચે છે પરંતુ હવે તે નિષ્ફળ જઈ રહ્યા છે. પહેલગામ આતંકવાદી હુમલા પછી ભારતે અપનાવેલા મક્કમ વલણને કારણે પાકિસ્તાન રક્ષણાત્મક મુદ્રામાં આવી ગયું છે. સોશિયલ મીડિયા પર વાયરલ થઈ રહેલા આ વીડિયોએ પાકિસ્તાનની અસલી કાયરતા અને હતાશાને ઉજાગર કરી દીધી છે.

વાયરલ વીડિયોમાં લશ્કર-એ-તૈયબાનો ઓપરેટિવ રિઝવાન હનીફ ભાષણ આપતો નજરે પડે છે, જેમાં તે સ્વીકારે છે કે છેલ્લા કેટલાક વર્ષોમાં ભારતીય ગુપ્તચર એજન્સીઓના એજન્ટોએ પાકિસ્તાનની અંદર ઘૂસીને ૩૦થી વધુ આતંકવાદીઓનો ખાત્મો કર્યો છે. તેણે પેશાવર, કરાચી, રાવલપિંડી, મુઝફ્ફરાબાદ અને રાવલકોટ જેવા અનેક પાકિસ્તાની શહેરો અને પ્રદેશોમાં થયેલી ટાર્ગેટ હત્યાઓ માટે ભારતીય એજન્ટોને જવાબદાર ઠેરવ્યા છે. છેલ્લા કેટલાક મહિનાઓથી પાકિસ્તાનમાં આતંકવાદીઓની રહસ્યમય હત્યાઓ બાદ સોશિયલ મીડિયા પર 'અજ્ઞાત ગનમેન' હેશટેગ વ્યાપકપણે ટ્રેન્ડ થઈ રહ્યું છે, જેનો ઉલ્લેખ હનીફે પણ પોતાના ભાષણમાં કર્યો હતો.

આ ભાષણ દરમિયાન હનીફે અન્ય ધર્મો વિરુદ્ધ ઉગ્ર, અપમાનજનક અને નફરતથી ભરપૂર ટિપ્પણીઓ પણ કરી હતી, જે દર્શાવે છે કે આતંકવાદી સંગઠનો કઈ રીતે ધાર્મિક લાગણીઓનો દુરુપયોગ કરીને જનતાને કટ્ટરપંથી બનાવવાનો પ્રયાસ કરે છે.

ઉલ્લેખનીય છે કે ૧૯૮૦ના દાયકામાં પાકિસ્તાનમાં સ્થપાયેલા લશ્કર-એ-તૈયબાની સ્થાપના હાફિઝ મોહમ્મદ સઈદ, ઝફર ઇકબાલ અને અબ્દુલ્લા આઝમ દ્વારા કરવામાં આવી હતી. અફઘાનિસ્તાનમાંથી સોવિયેત યુનિયનના ખસી ગયા બાદ આ કુખ્યાત જૂથનું મુખ્ય ધ્યાન ભારત વિરુદ્ધ ગતિવિધિઓ ચલાવવા માટે જમ્મુ અને કાશ્મીર તરફ વળ્યું હતું.

રાષ્ટ્રીય સુરક્ષા

દેશની અખંડિતતા અને સુરક્ષા સામે ખતરો બનતા આતંકવાદી નેટવર્ક્સ અને કાવતરાંઓ સામે સુરક્ષા એજન્સીઓની સતર્કતા જ રાષ્ટ્રની મજબૂતાઈ છે.