• અધિકારી એન.ડી. વાળા સામે માહિતી છુપાવવાનો આક્ષેપ – શું 575 મંડપો પાછળ 2.50 કરોડ ખર્ચાયા?
• મનપા અને કલેક્ટર કચેરીના આંકડાઓમાં ભારે વિસંગતતા – ભ્રષ્ટાચાર પર પડદો પાડવાની નીતિનો આક્ષેપ
• રોડ રિપેરિંગ અને પાર્કિંગના નામે લાખોની ઉચાપતની આશંકા – ચુકવણી પહેલા જ વિરોધનો વંટોળ

જૂનાગઢના ભવનાથ તળેટીમાં સંપન્ન થયેલા મહાશિવરાત્રી મેળા 2026 ના ભવ્ય આયોજન પાછળ થયેલા કરોડો રૂપિયાના ખર્ચને લઈને હવે વિવાદનો મધપૂડો છંછેડાયો છે. એક તરફ શ્રદ્ધાળુઓ મેળાનો આનંદ માણીને ઘરે પરત ફર્યા છે, ત્યારે બીજી તરફ વહીવટી તંત્ર દ્વારા રજૂ કરવામાં આવેલા ₹9 કરોડના ખર્ચના આંકડાઓએ ભ્રષ્ટાચારની ગંભીર આશંકાઓ જન્માવી છે. વિપક્ષનો આક્ષેપ છે કે ધર્મના નામે જનતાના પરસેવાની કમાણીની લૂંટ ચલાવવામાં આવી છે.

સૌથી વધુ વિવાદ ખર્ચના આંકડામાં થયેલા અધધ વધારાને લઈને છે. જૂનાગઢ મહાનગરપાલિકાએ શરૂઆતમાં આ મેળા માટે ₹3.13 કરોડનો અંદાજ રજૂ કર્યો હતો, જે વધારીને ₹4.13 કરોડ અને છેલ્લે સુધારેલી દરખાસ્તમાં સીધો ₹9 કરોડ પર પહોંચાડી દેવામાં આવ્યો છે. આ તોતિંગ વધારા પાછળ તંત્ર પાસે કોઈ સ્પષ્ટ જવાબ નથી. ખાસ કરીને લાઈટિંગ અને મંડપ સર્વિસ પાછળ ₹2.50-₹2.50 કરોડના ખર્ચ સામે સવાલો ઉઠી રહ્યા છે. 575 મંડપો માટે અઢી કરોડ રૂપિયાની ફાળવણીને વિપક્ષે 'કાગળ પરનું કૌભાંડ' ગણાવ્યું છે.

આ મામલે જ્યારે RTI દ્વારા માહિતી માંગવામાં આવી, ત્યારે રમતગમત અને સાંસ્કૃતિક વિભાગના અધિકારી એન.ડી. વાળા દ્વારા માહિતી છુપાવવાનો પ્રયાસ થયો હોવાનો ગંભીર આરોપ જાગૃત નાગરિકોએ લગાવ્યો છે. પૂછવામાં આવેલા 20 પ્રશ્નોમાંથી મોટાભાગના પ્રશ્નોના અસ્પષ્ટ જવાબો આપીને પાછલા પાંચ વર્ષના ખર્ચની વિગતો જાહેર ન કરવામાં આવતા ભ્રષ્ટાચાર પર પડદો પાડવાની નીતિ ઉઘાડી પડી છે. સફાઈ અને પાણી જેવી પાયાની સુવિધાઓ પાછળ પણ ₹2.50 કરોડનો ખર્ચ શંકાના દાયરામાં છે.

વિપક્ષી નેતાઓનું કહેવું છે કે મેળો પૂર્ણ થયા બાદ હવે જ્યારે આ બિલોની અંતિમ ચુકવણી થશે, ત્યારે એજન્સીઓને ફાયદો કરાવવા માટેના સુનિયોજિત ખેલ બહાર આવશે. રાજકોટના મેળાઓમાં પણ જ્યારે ખર્ચના મુદ્દાઓ ચર્ચાય છે, ત્યારે જૂનાગઢના આ 9 કરોડના આંકડાએ સમગ્ર સૌરાષ્ટ્રના રાજકારણને હચમચાવી દીધું છે. જનતાના નાણાંનો આ રીતે ધર્મની આડમાં થતો દુરુપયોગ જો ખરેખર સાબિત થશે, તો આગામી દિવસોમાં અનેક અધિકારીઓ અને નેતાઓ તપાસના ઘેરામાં આવી શકે છે.