• બેઝમેન્ટમાં લાગેલી આગ હોસ્પિટલ સુધી પ્રસરી, ફાયર ફાઈટરોની 2 કલાકની જહેમત
• ધુમાડાના ગોટેગોટા વચ્ચે ફાયર ટીમે 12 જીવ બચાવ્યા, 26 હજાર લીટર પાણીનો મારો
• ફાયર વિભાગની 4 ગાડીઓએ કાબૂ મેળવ્યો, પાર્કિંગમાં રહેલા વાહનો બળીને ખાખ

શહેરના વ્યસ્ત ગણાતા લીલાસર્કલ વિસ્તારમાં આવેલા આલેખ કોમ્પ્લેક્સમાં આજે બપોરના સમયે અચાનક આગ ફાટી નીકળતા અફરાતફરીનો માહોલ સર્જાયો હતો. બપોરના 4 કલાકના અરસામાં કોમ્પ્લેક્સના બેઝમેન્ટમાં આવેલા પાર્કિંગમાં અગમ્ય કારણોસર આગ લાગી હતી. જોતજોતામાં આગના ધુમાડાના ગોટેગોટા ઉપરના માળે આવેલી સદવિચાર હોસ્પિટલ સુધી પ્રસરી ગયા હતા, જેને પગલે હોસ્પિટલમાં દાખલ દર્દીઓ અને સ્ટાફમાં દોડધામ મચી ગઈ હતી.

બનાવની ગંભીરતાને જોતા ભાવનગર મહાનગરપાલિકાના ફાયર વિભાગને તુરંત જાણ કરવામાં આવી હતી. ફાયર વિભાગની હેડ ઓફિસ અને પૂર્વ ઝોનલ કચેરીમાંથી તાત્કાલિક 4 ફાયર ફાઈટરોની ગાડીઓ ઘટના સ્થળે પહોંચી હતી. આગના કારણે હોસ્પિટલમાં કાળોઘેરો ધુમાડો છવાઈ ગયો હતો, જેના કારણે દર્દીઓને શ્વાસ લેવામાં તકલીફ પડી રહી હતી. ફાયર ટીમોએ જીવના જોખમે હોસ્પિટલમાં પ્રવેશી અંદર એડમિટ 10 થી 12 દર્દીઓનું સુરક્ષિત રેસ્ક્યૂ કરી તેમને અન્ય હોસ્પિટલમાં ખસેડવાની કામગીરી હાથ ધરી હતી.

આગને કાબૂમાં લેવા માટે ફાયર વિભાગ દ્વારા આશરે 26 હજાર લીટર પાણીનો છંટકાવ કરવામાં આવ્યો હતો. બે કલાકની ભારે જહેમત બાદ આગ પર સંપૂર્ણ કાબૂ મેળવી શકાયો હતો. આગના કારણે બેઝમેન્ટમાં પાર્ક કરેલા કેટલાક વાહનોને ભારે નુકસાન પહોંચ્યું હોવાનું પ્રાથમિક તપાસમાં બહાર આવ્યું છે. આ કોમ્પ્લેક્સમાં હોસ્પિટલ ઉપરાંત લાયબ્રેરી અને કોચિંગ ક્લાસીસ પણ કાર્યરત હોવાથી આગ લાગતા જ વિદ્યાર્થીઓ અને વાંચકો જીવ બચાવવા બહાર દોડી આવ્યા હતા.

ફાયર અધિકારીઓના જણાવ્યા અનુસાર, હોસ્પિટલમાં ધુમાડો ભરાઈ ગયો હોવાથી વેન્ટીલેશનની પ્રક્રિયા હાથ ધરવામાં આવી હતી. સમયસર ફાયર બ્રિગેડની કામગીરી અને દર્દીઓના સ્થળાંતરને કારણે કોઈ મોટી જાનહાનિ થઈ નથી, જે એક મોટી રાહતની વાત છે. જો આગ વધુ વિકરાળ બની હોત અથવા રાત્રિના સમયે લાગી હોત તો મોટી દુર્ઘટના સર્જાઈ શકી હોત.

હાલમાં આગ લાગવાનું ચોક્કસ કારણ જાણી શકાયું નથી, પરંતુ શોર્ટ સર્કિટ હોવાની આશંકા સેવાઈ રહી છે. પોલીસે આ મામલે પંચનામું કરી આગળની તપાસ શરૂ કરી છે. આ ઘટનાએ ફરી એકવાર વ્યાપારી કોમ્પ્લેક્સમાં ફાયર સેફ્ટીના સાધનો અને ઈમરજન્સી એક્ઝિટની અનિવાર્યતા પર સવાલો ઊભા કર્યા છે. સદનસીબે આ અકસ્માતમાં કોઈ ગંભીર ઈજા કે મૃત્યુ નોંધાયા નથી.