સિટી ન્યુઝ @  અમદાવાદ 

ગુજરાતમાં ચોમાસાની વિદાય ટાણે ભાદરવા મહિનાની આકરી ગરમી અને અસહ્ય ઉકળાટનો પ્રારંભ થતાં લોકો પરસેવે રેબઝેબ થઈ રહ્યા છે. રાજ્યના અનેક વિસ્તારોમાં તાપમાનનો પારો ઊંચે જઈ રહ્યો છે, તો બીજી તરફ કેટલાક હિસ્સાઓમાં વરસાદી ઝાપટાં પણ વરસી રહ્યા છે, જેના કારણે મિશ્ર અને ઉકળાટભર્યું વાતાવરણ જોવા મળી રહ્યું છે.

ભુજમાં ગરમીનો પારો રેકોર્ડબ્રેક 39.5 ડિગ્રી સેલ્સિયસ સુધી પહોંચી જતાં ભુજવાસીઓ આકરી ગરમીથી શેકાયા હતા. આ ઉપરાંત રાજ્યના અન્ય મુખ્ય શહેરોમાં પણ તાપમાન ઉંચું રહ્યું હતું, જેમાં અમદાવાદમાં 36.2 ડિગ્રી, રાજકોટમાં 37.5, સુરતમાં 34.3, વડોદરામાં 36.4, ભાવનગરમાં 36.8, ગાંધીનગરમાં 36 અને કંડલામાં 36.5 ડિગ્રી સેલ્સિયસ તાપમાન નોંધાયું હતું.

આ ગરમી અને બફારાના વાતાવરણ વચ્ચે છેલ્લા 24 કલાકમાં રાજ્યના 47 તાલુકાઓમાં વરસાદી ઝાપટાં નોંધાયા છે. ગીર સોમનાથના ઊના તાલુકામાં સૌથી વધુ 2.72 ઈંચ, અમરેલીના રાજુલામાં 2.60 ઈંચ, પોરબંદરના રાણાવાવમાં 2.36 ઈંચ, નવસારીમાં 2.24 ઈંચ અને વલસાડના ધરમપુરમાં 1.18 ઈંચ વરસાદ ખાબક્યો હતો, જેનાથી થોડી રાહત મળી હતી.

ચાલુ મોસમ દરમિયાન ગુજરાતમાં અત્યાર સુધીમાં સરેરાશ 810 મિ.મી. વરસાદ થયો છે, જે વાર્ષિક સરેરાશ વરસાદના 89 ટકા જેટલો થાય છે. પ્રદેશવાર સ્થિતિ જોઈએ તો દક્ષિણ ગુજરાતમાં સરેરાશ કરતાં વધુ 114 ટકા વરસાદ નોંધાઈ ચૂક્યો છે, જ્યારે પૂર્વ-મધ્ય ગુજરાતમાં 89 ટકા, સૌરાષ્ટ્રમાં 71.25 ટકા અને ઉત્તર ગુજરાતમાં 71 ટકા વરસાદ થયો છે, જેમાં કચ્છ ઝોનમાં સૌથી ઓછો 57.60 ટકા વરસાદ નોંધાયો છે.

હવામાન વિભાગના જણાવ્યા અનુસાર આગામી 24 કલાક દરમિયાન પણ રાજ્યના કેટલાક છૂટાછવાયા વિસ્તારોમાં હળવા વરસાદી ઝાપટાં પડે તેવી સંભાવના વ્યક્ત કરવામાં આવી છે, જેનાથી તાપમાનમાં સામાન્ય ઘટાડો થઈ શકે છે.

ગુજરાતમાં મિશ્ર હવામાનનો દોવો 

વરસાદ અને ગરમીના આ બેવડા માહોલ વચ્ચે નાગરિકોને ભાદરવા મહિનાના ઉકળાટનો સામનો કરવો પડી રહ્યો છે, જોકે આગામી દિવસોમાં સ્થિતિ સામાન્ય થવાની આશા છે.