સિટી ન્યૂઝ @ નવી દિલ્હી

સોશિયલ મીડિયા પ્લેટફોર્મ ઇન્સ્ટાગ્રામ પર બાળકોના જાતીય શોષણ સંબંધિત કન્ટેન્ટ અને તેને પ્રોત્સાહન આપતી જાહેરાતોના મામલાને સરકારે અત્યંત ગંભીરતાથી લીધો છે. કેન્દ્રીય IT મંત્રાલયે આ સમગ્ર મામલે ઇન્સ્ટાગ્રામની પેરેન્ટ કંપની 'મેટા' (Meta) ને સમન્સ પાઠવી જવાબ માંગ્યો છે. સરકાર આ તપાસ કરવા માંગે છે કે બાળકો માટે હાનિકારક આવી વાંધાજનક જાહેરાતો પ્લેટફોર્મ પર કેવી રીતે પ્રસારિત થઈ અને તેને રોકવા માટે કંપની દ્વારા અત્યાર સુધી શું સુરક્ષા વ્યવસ્થા ગોઠવવામાં આવી હતી.

કેન્દ્રીય IT મંત્રી અશ્વિની વૈષ્ણવે આ મામલે કડક વલણ અપનાવતા સ્પષ્ટ શબ્દોમાં જણાવ્યું છે કે, "બાળકોની સુરક્ષા સંબંધિત કોઈપણ પ્રકારનું વાંધાજનક કે ગેરકાયદેસર કન્ટેન્ટ કોઈપણ ભોગે સહન કરવામાં આવશે નહીં." મંત્રાલય મેટા પાસે તેમની સુરક્ષા નીતિઓ, મોડરેશન પ્રક્રિયા અને આવી હાનિકારક સામગ્રીને ફિલ્ટર કરવામાં રહેલી નિષ્ફળતા અંગે લેખિતમાં ખુલાસો માંગશે. વોટ્સએપ બાદ હવે ઇન્સ્ટાગ્રામ પર સરકારની આ લાલ આંખ સોશિયલ મીડિયા કંપનીઓ માટે ચેતવણી સમાન છે.

આ ઘટનાએ સોશિયલ મીડિયા પ્લેટફોર્મ્સની જવાબદારી અને તેમના અલ્ગોરિધમ્સની પારદર્શિતા સામે ગંભીર સવાલો ઊભા કર્યા છે. બાળકોના માનસિક અને શારીરિક સ્વાસ્થ્ય સાથે ચેડાં કરતા આવા કન્ટેન્ટને રોકવા માટે સરકાર હવે ડિજિટલ સુરક્ષાના નિયમોને વધુ કડક બનાવવાના મૂડમાં છે. મેટાએ હવે સાબિત કરવું પડશે કે તેઓ ભારતીય વપરાશકર્તાઓ, ખાસ કરીને બાળકોની સુરક્ષા માટે પૂરતા પગલાં લઈ રહ્યા છે. જો તપાસમાં કંપનીની બેદરકારી સાબિત થશે, તો મેટા સામે મોટી કાયદાકીય કાર્યવાહી પણ થઈ શકે છે.

ડિજિટલ પ્લેટફોર્મની જવાબદારી અને બાળ સુરક્ષા

ઇન્ટરનેટ અને સોશિયલ મીડિયાના યુગમાં બાળકોની સુરક્ષા એ માત્ર વાલીઓની જ નહીં, પરંતુ પ્લેટફોર્મ પૂરા પાડતી કંપનીઓની પણ નૈતિક અને કાયદાકીય ફરજ છે. જ્યારે એલ્ગોરિધમ દ્વારા આવી અસંવેદનશીલ જાહેરાતો બાળકો સુધી પહોંચે છે, ત્યારે તે પ્લેટફોર્મની સુરક્ષા વ્યવસ્થા પર સીધો પ્રશ્ન ઉભો કરે છે. સરકારનું આ પગલું ડિજિટલ સુરક્ષાના ક્ષેત્રમાં એક જવાબદાર વાતાવરણ ઉભું કરવા માટે અનિવાર્ય છે. કંપનીઓએ માત્ર નફા પર જ નહીં, પણ વપરાશકર્તાઓની સુરક્ષા પર વિશેષ ધ્યાન આપવું જ પડશે.