સિટી ન્યુઝ @ સુરત

સુરતમાં છેલ્લા 15 દિવસથી ચાલી રહેલા આકરા બફારા અને અસહ્ય ઉકળાટ બાદ મોડી રાત્રે મેઘરાજાએ ધમાકેદાર એન્ટ્રી કરી છે. વાતાવરણમાં આવેલા અચાનક પલટા સાથે ગાજવીજ અને તીવ્ર પવન સાથે થયેલા વરસાદને કારણે સુરત શહેરમાં સરેરાશ એકથી દોઢ ઇંચ જેટલો વરસાદ નોંધાયો છે. આ વરસાદથી સુરતીઓને ભલે બફારામાંથી રાહત મળી હોય, પરંતુ મનપાના પ્રી-મોન્સૂન કામગીરીના પોકળ દાવાઓની પોલ પ્રથમ વરસાદમાં જ ખૂલી ગઈ છે.

શહેરના નીચાણવાળા વિસ્તારો જેવા કે ઉધના અને લિંબાયતમાં પાણી ભરાઈ જવાની ગંભીર સમસ્યા સર્જાઈ છે. ખાસ કરીને ઉધના અને ડિંડોલીને જોડતા ભીમનગર ગરનાળામાં વહેલી સવારથી જ ઘૂંટણસમા પાણી ભરાઈ ગયા હતા, જે દર વર્ષની જેમ આ વખતે પણ 'સ્વિમિંગ પૂલ' જેવી સ્થિતિમાં ફેરવાઈ ગયું છે. ડ્રેનેજ લાઈનો બ્લોક હોવાને કારણે ગંદા પાણી ઉભરાઈને રસ્તા પર આવી ગયા હતા, જેના કારણે વાહનચાલકોના વાહનો અધવચ્ચે બંધ પડી જતા લોકો કલાકો સુધી અટવાઈ પડ્યા હતા.

વહેલી સવારે નોકરી અને ધંધા પર જતા શ્રમિકો અને કર્મચારીઓને ભારે હાલાકીનો સામનો કરવો પડ્યો હતો. ઉધના-નવસારી રોડ જેવા વ્યસ્ત વિસ્તારોમાં પણ પાણી ભરાતા ટ્રાફિક જામની સમસ્યા સર્જાઈ હતી. પાલિકાએ કરોડોના ખર્ચે પ્રી-મોન્સૂન કામગીરી કરી હોવાના દાવા કર્યા હતા, પરંતુ વરસાદની શરૂઆત થતાં જ તમામ વિસ્તારો પાણી-પાણી થઈ ગયા છે. મનપાના આ વહીવટ સામે સ્થાનિક જનતામાં ભારે રોષ જોવા મળી રહ્યો છે અને લોકો પૂર્વ આયોજનના અભાવે પોતાની રોષ વ્યક્ત કરી રહ્યા છે.

જર્જરિત વ્યવસ્થા અને તંત્રની નિષ્ફળતા

સુરત જેવા સ્માર્ટ સિટીમાં ચોમાસાના પ્રથમ વરસાદમાં જ ઘૂંટણસમા પાણી ભરાવા તે વહીવટી તંત્રની ગંભીર બેદરકારી સૂચવે છે. દર વર્ષે ગરનાળાઓની સફાઈ પાછળ લાખોનો ખર્ચ છતાં પરિણામ શૂન્ય રહેવું એ તંત્રની કામગીરી પર પ્રશ્નાર્થ ચિન્હ મૂકે છે. સામાન્ય જનતાને ટ્રાફિક અને પાણી ભરાવવાની સમસ્યામાંથી મુક્તિ અપાવવી એ પાલિકાની પ્રાથમિક જવાબદારી છે, જે પૂરી કરવામાં આ વખતે પણ તંત્ર સંપૂર્ણપણે નિષ્ફળ રહ્યું છે.