સુરત સબ-ઝોનલ ઓફિસના એન્ફોર્સમેન્ટ ડિરેક્ટોરેટ (ED) દ્વારા 21 સપ્ટેમ્બરે વાલિયા શિબાભાઈ ઝુંઝાભાઈ ઉર્ફે ભૂપતભાઈ અને અન્ય લોકોના કેસમાં પ્રિવેન્શન ઓફ મની લોન્ડરિંગ એક્ટ (PMLA), 2002 ની જોગવાઈઓ હેઠળ મોટી કાર્યવાહી કરવામાં આવી છે. આ કાર્યવાહી અંતર્ગત ભાવનગર જિલ્લાના મહુવા અને તળાજા, અમદાવાદ શહેરમાં ઓઢવ અને સાબરમતી તેમજ મહારાષ્ટ્રના પુણેના હડપસરમાં આવેલી આશરે 1.15 કરોડ રૂપિયાની કુલ 15 સ્થાવર મિલકતો કામચલાઉ રીતે જપ્ત કરવામાં આવી છે.

આ કેસની શરૂઆત એસીબી પોલીસ સ્ટેશન, ભાવનગર દ્વારા નોંધાયેલી એફઆઈઆર (FIR) અને સ્પેશિયલ (ACB) કોર્ટ, ભાવનગર સમક્ષ કરવામાં આવી હતી. ગુજરાત લેન્ડ ડેવલપમેન્ટ કોર્પોરેશન લિમિટેડ (GLDC), ભરૂચના તત્કાલીન ફિલ્ડ આસિસ્ટન્ટ વાલિયા શિબાભાઈ ઝુંઝાભાઈ ઉર્ફે ભૂપતભાઈ સામે ભ્રષ્ટાચાર નિવારણ અધિનિયમ, 1988 ની કલમ 13(1)(b) અને 13(2) હેઠળ ચાર્જશીટ દાખલ કરવામાં આવી હતી, જેના આધારે ED દ્વારા સઘન તપાસ હાથ ધરવામાં આવી હતી.

એન્ફોર્સમેન્ટ ડિરેક્ટોરેટ (ED) ને તપાસ દરમિયાન જાણવા મળ્યું હતું કે વાલિયા શિબાભાઈ ઝુન્ઝાભાઈ એક જાહેર સેવક હોવા છતાં, તેમણે પોતાની નોકરી દરમિયાન આવકના જાણીતા સ્ત્રોતો કરતાં ઘણી વધુ એટલે કે આશરે 1,15,18,350 રૂપિયાની બિનહિસાબી સંપત્તિ વસાવી હતી. આ ગેરકાયદેસર સંપત્તિ સામે કડક પગલાં લેતા તપાસ એજન્સીએ આ મિલકતોને તાબામાં લીધી છે.

તપાસના આધારે, 15 સ્થાવર મિલકતો, જેની કુલ કિંમત 1,14,98,600 રૂપિયા થાય છે, તેને પીએમએલએ (PMLA), 2002 ની કલમ 5 (1) હેઠળ 21 સપ્ટેમ્બરે સત્તાવાર રીતે કામચલાઉ રીતે જપ્ત કરવામાં આવી છે. સરકારી પદનો દુરુપયોગ કરીને ખોટી રીતે સંપત્તિ એકત્ર કરનારાઓ સામે કેન્દ્રીય એજન્સીઓની આ લાલ આંખથી ભ્રષ્ટ તત્વોમાં ભારે ફફડાટ ફેલાઈ ગયો છે.

આ સમગ્ર પ્રકરણમાં એજન્સી દ્વારા હાલ વધુ તપાસ ચાલુ રાખવામાં આવી છે અને આ નાણાકીય ગોટાળા સાથે સંકળાયેલા અન્ય શંકાસ્પદ લોકોની ભૂમિકાની પણ ઊંડાણપૂર્વક ચકાસણી કરવામાં આવી રહી છે, જેથી ભ્રષ્ટાચારના આ નેટવર્કનો પર્દાફાશ કરી શકાય.

ભ્રષ્ટાચાર વિરુદ્ધ કાયદાકીય શિકંજો

સરકારી પદો પર રહીને ગેરકાયદે સંપત્તિ રળનારાઓ સામે તપાસ એજન્સીઓની આ સખત કાર્યવાહી નાણાકીય ગુનાઓ પર અંકુશ લાવવા માટે અત્યંત મહત્વપૂર્ણ સાબિત થઈ રહી છે.