સિટી ન્યુઝ @ પેરિસ

બોલિવૂડ અભિનેત્રી ઐશ્વર્યા રાય બચ્ચન ફરી એકવાર પોતાના અનોખા અને આકર્ષક લુકને કારણે ચર્ચામાં આવી છે. સોમવારે પેરિસ ફેશન વીક દરમિયાન લોરિયલ પેરિસના પ્રખ્યાત ‘લે ડેફિલે’ શોમાં તેણે શાનદાર રેમ્પ વોક કરીને તમામનું ધ્યાન ખેંચ્યું હતું. એફિલ ટાવર અને ઇકોલ મિલિટેરના સુંદર બેકગ્રાઉન્ડ વચ્ચે ઐશ્વર્યાએ પોતાના રોયલ અને ગ્લેમરસ અંદાજથી ઉપસ્થિત સૌ કોઈને મંત્રમુગ્ધ કરી દીધા હતા.

આ ખાસ રનવે માટે ઐશ્વર્યાએ સિરિયન લક્ઝરી બ્રાન્ડ ‘યારા શૂમેકર’ ના ફોલ અને વિન્ટર કલેક્શનમાંથી ખાસ તૈયાર કરાવેલું બ્લેક વેલ્વેટ કસ્ટમ ગાઉન પહેર્યું હતું. પ્રખ્યાત સેલિબ્રિટી સ્ટાઇલિસ્ટ મોહિત રાય દ્વારા ડિઝાઈન કરાયેલા આ રોયલ આઉટફિટમાં 3D ફ્રિન્જ એમ્બ્રોઇડરી અને ક્રિસ્ટલથી સજ્જ કેપ શ્રગનો વિશેષ સમાવેશ કરવામાં આવ્યો હતો.

ગાઉનની ડીપ નેકલાઈન અને ફ્લોર-લેન્થ સિલુએટ તેના લુકને વધુ આકર્ષક બનાવતા હતા, જ્યારે કેપની બોર્ડર પર મોતી અને ક્રિસ્ટલનું ઝીણવટભર્યું કામ જોવા મળ્યું હતું. આ સાથે તેણે સુંદર ડાયમંડ ક્રાઉન, ડાયમંડ રિંગ્સ અને હાઈ હીલ્સ પહેરીને પોતાના લુકને પરિપૂર્ણ કર્યો હતો, જે તેના સૌંદર્યમાં ચાર ચાંદ લગાવતો હતો.

આ બ્લેક કસ્ટમ ગાઉન ઉપરાંત સૌથી વધુ ચર્ચા ઐશ્વર્યાના નવા હેર કલરની થઈ રહી છે, કારણ કે પેરિસના આ રનવે પર તે પહેલીવાર બોલ્ડ ફાયરી રેડ એટલે કે લાલ હેર કલરમાં જોવા મળી હતી. સાઈડ પાર્ટીશન અને સોફ્ટ વેવ્ઝમાં સ્ટાઇલ કરેલા આ લાલ વાળ અને કાળા કપડાંનું કોમ્બિનેશન તેને અત્યંત બોલ્ડ અને અલગ લુક આપી રહ્યું હતું.

સોશિયલ મીડિયા પર પેરિસ ફેશન વીકનો એક વિડીયો પણ ખૂબ વાયરલ થઈ રહ્યો છે, જેમાં ઐશ્વર્યા પ્રખ્યાત બ્રિજર્ટન સીરિઝની સ્ટાર સિમોન એશલે સાથે વાતચીત કરતી અને હાથ પકડીને ચાલતી નજરે પડે છે. લાંબા સમયથી લોરિયલ પેરિસ સાથે ગ્લોબલ એમ્બેસેડર તરીકે જોડાયેલી ઐશ્વર્યા દર વર્ષે પોતાના અંદાજથી નવી ફેશન સ્ટેટમેન્ટ ઊભી કરે છે.

ફેશન જગત અને ગ્લેમર દુનિયા

આંતરરાષ્ટ્રીય ફેશન મંચો પર ભારતીય કલાકારોની ઉપસ્થિતિ દેશનું નામ રોશન કરે છે. ફેશન અને સ્ટાઇલના પ્રયોગો હંમેશાં દુનિયાભરના દર્શકોનું ધ્યાન ખેંચતા હોય છે અને કલાકારોને એક વૈશ્વિક ઓળખ પૂરી પાડે છે.