સિટી ન્યુઝ @ સુરત

સુરત મહાનગરપાલિકામાં ભ્રષ્ટાચારી રીતરસમો અપનાવીને શહેરીજનો અને ઇજારદારોને પરેશાન કરનાર અધિકારીઓ સામે આખરે લાંચ રૂશ્વત વિરોધી વિભાગ (ACB) સક્રિય થયો છે. રાજ્યના એસીબી વિભાગે સુરત મનપાના પાંચ અધિકારીઓ વિરુદ્ધ ભ્રષ્ટાચારના ગંભીર આક્ષેપો મામલે તપાસ કરવાની સત્તાવાર મંજૂરી માંગી છે. એસીબીના નિયામકે મ્યુનિસિપલ કમિશનરને પત્ર લખીને આ મંજૂરી માંગતા પાલિકાના આંતરિક વર્તુળોમાં ભારે ખળભળાટ મચી ગયો છે. લાંબા સમયથી નેતાઓ દ્વારા કરવામાં આવતી ફરિયાદોને ગંભીરતાથી ન લેવાતી હોવા છતાં, હવે આ પ્રકરણમાં સત્તાવાર ગુનો દાખલ થવાની પૂરી શક્યતાઓ સેવાઈ રહી છે.

આ સમગ્ર પ્રકરણ વર્ષ ૨૦૧૯ના સ્ટ્રીટલાઈટ મેન્ટેનન્સ અને એલ.ઈ.ડી. સપ્લાયના ચાર ટેન્ડરો સાથે સીધી રીતે જોડાયેલું છે. ઇજારદાર ગોપાલ લાંબા દ્વારા આ ચાર ટેન્ડરોમાં સૌથી ઓછો ભાવ ભરવામાં આવ્યો હોવા છતાં, પાલિકાના કેટલાક ભ્રષ્ટ અધિકારીઓએ મિલિભગત કરીને ખોટી રીતે આ ટેન્ડરોને દફતરે કરી દીધા હતા. આ અંગે ઇજારદારે એસીબી સમક્ષ ભ્રષ્ટ રીતરસમો બાબતે સત્તાવાર ફરિયાદ નોંધાવી હતી. આ મામલે લાંબી તપાસ હાથ ધરીને તમામ સંબંધીઓના નિવેદનો નોંધીને એસીબીની સુરત કચેરીએ વડી કચેરીને વિસ્તૃત અહેવાલ મોકલી આપ્યો હતો, જેના આધારે હવે ભ્રષ્ટાચાર નિવારણ અધિનિયમ મુજબ તપાસની મંજૂરી માંગવામાં આવી છે.

એસીબી દ્વારા તત્કાલિન વિજિલન્સ ઓફિસર જયેશ ચૌહાણ, નિવૃત્ત એડિશનલ સિટી ઇજનેર કે.એચ. ખતવાણી, નિવૃત્ત ડેપ્યુટી ઇજનેર કિરીટ સુવર્ણકાર, ડેપ્યુટી ઇજનેર રોહિત પટેલ અને ડેપ્યુટી ઇજનેર કે.ટી. પટેલ સામે તપાસ કરવાની મંજૂરી માંગવામાં આવી છે. આ પાંચ અધિકારીઓમાંથી જયેશ ચૌહાણ અને કે.એચ. ખતવાણી નિવૃત્ત થઈ ગયા છે, જ્યારે કિરીટ સુવર્ણકારે રાજીનામું આપી દીધું છે અને કે.ટી. પટેલ હાલ હાઇડ્રોલિક વિભાગમાં ફરજ બજાવી રહ્યા છે. હવે પાલિકાના નવા કમિશનર રાજકુમાર બેનિવાલ આ કૌભાંડી અધિકારીઓ સામે તપાસ માટે મંજૂરી આપે છે કે કેમ, તેના પર જ તેમનું આગામી ભવિષ્ય નિર્ભર છે.

આ કૌભાંડમાં સૌથી વધુ ચર્ચા પૂર્વ વિજિલન્સ ઓફિસર જયેશ ચૌહાણની થઈ રહી છે. અગાઉ ટર્શરી ટ્રીટમેન્ટ પ્લાન્ટના એક ટેન્ડર વિવાદમાં પણ તેમણે તત્કાલિન કમિશનર શાલિની અગ્રવાલના દબાણમાં આવીને નિર્દોષ કાર્યપાલક ઇજનેર કેતન દેસાઈ વિરુદ્ધ પાયાવિહોણો રિપોર્ટ તૈયાર કરી તેમને સસ્પેન્ડ કરાવ્યા હોવાનો ગંભીર આક્ષેપ છે, જેમાં એક પૈસાનો પણ ભ્રષ્ટાચાર સાબિત થયો ન હતો. હવે જ્યારે એસીબીની સીધી રડારમાં જયેશ ચૌહાણ આવ્યા છે, ત્યારે પાલિકાના ભ્રષ્ટ વહીવટી તંત્રમાં ફફડાટ ફેલાઈ ગયો છે.

વહીવટી પારદર્શિતા અને ભ્રષ્ટાચાર વિરોધી પગલાં

સરકારી ટેન્ડરો અને પ્રક્રિયાઓમાં પક્ષપાત અને મનસ્વી નિર્ણયો અટકાવવા માટે એજન્સીઓ દ્વારા લેવાતી કડક તપાસી પગલાંઓ વહીવટી તંત્રમાં શિસ્ત અને પ્રામાણિકતા સ્થાપવા માટે અનિવાર્ય છે.