=> માતા અને લીવ–ઇન પાર્ટનરની ધરપકડ

સિટી ન્યૂઝ@તિરુવનંતપુરમ

કેરળના તિરુવનંતપુરમ જિલ્લાના નેડુમંગડમાં સતત શારીરિક ત્રાસ અને મારપીટથી દોઢ વર્ષના બાળકનું મોત થયું. પોલીસે બાળકની માતા અખિલા (૨૪) અને તેના લિવ-ઇન પાર્ટનર અશ્કર (૩૧) ને ૩૧ મેના રોજ ધરપકડ કરી છે. બાળકનું નામ અર્શિત હતું.

આરોપી અશ્કર ૨૯ મેની સાંજે બાળકને ગંભીર હાલતમાં તિરુવનંતપુરમની એક ખાનગી હોસ્પિટલમાં લઈ ગયો હતો. તેણે ડોક્ટરોને જણાવ્યું કે બાળકના ગળામાં ખોરાક ફસાઈ ગયો હતો, પરંતુ હોસ્પિટલમાં દાખલ થયાના થોડી જ મિનિટોમાં તેનું મોત થયું.

પોસ્ટમોર્ટમ રિપોર્ટમાં સામે આવ્યું કે બાળકના શરીર પર કુલ ૫૧ ઈજાના નિશાન હતા. પગ પર સિગારેટ અને લાઇટરથી દાઝવાના નિશાન મળ્યા. પ્રાઇવેટ પાર્ટ પર પણ ઈજાઓ હતી. મોતનું કારણ ગંભીર આંતરિક રક્તસ્ત્રાવ (ઇન્ટર્નલ બ્લીડિંગ) જણાવાયું. તપાસમાં સામે આવ્યું કે બાળકના બાયોલોજિકલ પિતાનું ૨૦૨૪માં અવસાન થયું હતું. માતા બાળક સાથે લિવ-ઇન પાર્ટનર અશ્કર સાથે રહેતી હતી. આ દરમિયાન અશ્કર બાળકને ત્રાસ આપતો રહ્યો, માતાએ તેને રોકવાનો પ્રયાસ કર્યો ન હતો.

આરોપ છે કે અશ્કર બાળકનું માથું દીવાલ પર મારતો હતો. તેણે ઘણી વખત બાળકના પગ પર લાઇટર અને સિગારેટથી ડામ આપ્યા હતા. બે અઠવાડિયા પહેલાં, આરોપી માતા બાળકને ખોળામાં લઈને એક વ્લોગરના વીડિયોમાં રેકોર્ડ થઈ હતી. ત્યારે બાળકના બંને હાથ તૂટેલા હતા. હાથ પર પ્લાસ્ટર હતું.

વ્લોગરના પૂછવા પર માતાએ કહ્યું હતું કે બાળક સાયકલ પરથી પડી ગયું હતું. પરંતુ પોલીસને શંકા છે કે તેની મારપીટ દરમિયાન બાળકના હાથ તૂટી ગયા હતા. બાળકના મૃત્યુ સમયે તેની માતા તમિલનાડુમાં એક ડાન્સ કાર્યક્રમમાં ગઈ હતી. પોલીસે તેને પૂછપરછ માટે બોલાવી અને બાદમાં તેની ધરપકડ કરી લીધી.

૩૧ મેના રોજ ધરપકડ બાદ બંને આરોપીઓને કસ્ટડીમાં મોકલી દેવામાં આવ્યા. બાળકની નાની રીનાએ સ્થાનિક મીડિયાને જણાવ્યું કે તેમને અશ્કર પર પહેલેથી જ શંકા હતી. તેમણે ઘણી વાર પોતાની દીકરીને બાળકને તેમની પાસે છોડી દેવા વિનંતી કરી હતી, પરંતુ તેણે તેમ કર્યું નહીં. આરોપી અશ્કરની પહેલી પત્નીની માતાએ પણ તેના પર ઘરેલું હિંસાના આરોપો લગાવ્યા છે. તેમણે દાવો કર્યો કે લગ્ન દરમિયાન અશ્કર તેમની દીકરીને ખરાબ રીતે મારતો હતો અને તેનું માથું દીવાલ સાથે અથડાવતો હતો. પોલીસનું કહેવું છે કે અશ્કર વિરુદ્ધ અગાઉ કોઈ ગુનાહિત કેસ નોંધાયેલો નથી.