સિટી ન્યુઝ @ નવી દિલ્હી 

ઇઝરાયલના વડાપ્રધાન બેન્જામિન નેતન્યાહૂની સત્તા સામે રાજકીય પડકાર વધુ તીવ્ર બન્યો છે, જ્યાં વડાપ્રધાન પદના મજબૂત દાવેદાર અને ઇઝરાયલના પૂર્વ સેનાપ્રમુખ ગાદી આઇઝેનકોટે નેતન્યાહૂને પત્ર લખીને નવી સરકારની રચના અને શપથવિધિ થાય ત્યાં સુધી ઈરાન સામે કોઈ મોટો સૈન્ય નિર્ણય ન લેવાની સ્પષ્ટ ચેતવણી આપી છે.

'ધ જેરુસલેમ પોસ્ટ'ના અહેવાલ મુજબ, આઇઝેનકોટે પોતાના પત્રમાં ભારપૂર્વક જણાવ્યું છે કે રાષ્ટ્રીય સુરક્ષા સાથે જોડાયેલા મહત્વના અને મોટા નિર્ણયો લેતા પહેલાં નવી સરકારની રચનાની રાહ જોવી જોઈએ, કારણ કે નવી સરકાર પાસે નેસેટમાં બહુમતી હશે અને આવા નિર્ણયો લેવાનો અધિકાર માત્ર તેમને જ મળવો જોઈએ.

આઇઝેનકોટે આ મામલે એટર્ની જનરલ ગાલી બહરાવ-મિયારાને પણ હસ્તક્ષેપ કરવાની અપીલ કરવા ઉપરાંત વડાપ્રધાન કાર્યાલય પાસે દરરોજ ગુપ્તચર અને રાજદ્વારી બાબતો અંગે બ્રીફિંગ આપવાની માગ કરી હતી, જેને સ્વીકારીને વડાપ્રધાન કાર્યાલય દ્વારા તેમને સંબંધિત મુદ્દાઓ પર માહિતી આપવામાં આવી છે.

ઇઝરાયલના રાષ્ટ્રપતિ દ્વારા સરકાર રચવા માટે તક આપવામાં આવ્યા બાદ આઇઝેનકોટ અને નેતન્યાહૂ વચ્ચે સત્તા સંઘર્ષ ચરમસીમા પર પહોંચ્યો છે, કારણ કે એવી આશંકા વ્યક્ત કરવામાં આવી રહી હતી કે નેતન્યાહૂ પોતાની કાર્યકારી સરકારનો કાર્યકાળ લંબાવવા માટે ઈરાન સામે હુમલો કરી શકે છે.

આ રાજકીય ઉથલપાથલ વચ્ચે અરબ પક્ષો સરકાર રચવામાં 'કિંગમેકર'ની ભૂમિકા ભજવી શકે છે, અથવા નેતન્યાહૂના કેટલાક સાથી પક્ષો આઇઝેનકોટ સાથે જોડાઈને નવી સરકાર બનાવી શકે છે, જે ઇઝરાયલની આગામી રાજકીય દિશા નક્કી કરવામાં નિર્ણાયક સાબિત થશે.

યુદ્ધ અને રાજકારણ વચ્ચેની નાજુક સંતુલન રેખા

જ્યારે કોઈપણ દેશ યુદ્ધ કે તણાવપૂર્ણ પરિસ્થિતિનો સામનો કરી રહ્યો હોય, ત્યારે આંતરિક રાજકીય સત્તા પરિવર્તન અને રાષ્ટ્રીય સુરક્ષા વચ્ચે સંતુલન જાળવવું અત્યંત સંવેદનશીલ બની જતું હોય છે. નેતૃત્વ પરિવર્તનના સમયગાળામાં લેવાતા મોટા સૈન્ય નિર્ણયો સમગ્ર દેશની ભૌગોલિક અને રાજકીય સ્થિરતા પર ઊંડી અસર છોડતા હોય છે, જેના કારણે લોકતાંત્રિક સંસ્થાઓ અને સેનાની ભૂમિકા નિર્ણાયક બની જાય છે.