• ઘરવખરી, અનાજ અને કપડાં પલળી જવાથી પરિવારોને મોટું આર્થિક નુકસાન થયું છે.

• મોટી સંખ્યામાં મહિલાઓ સહિત સ્થાનિક રહીશો વિરોધ પ્રદર્શનમાં જોડાયા હતા.

• ઘટનાની નિષ્પક્ષ તપાસ કરી જવાબદારો સામે પગલાં ભરવા રજૂઆત કરાઈ છે.

સિટી ન્યુઝ @ ધ્રાંગધ્રા

ધ્રાંગધ્રા, ધ્રાંગધ્રા શહેરમાં ડીસીડબલ્યુ (DCW) કંપની સામે સ્થાનિકોનો વિરોધ સતત બીજા દિવસે પણ અડગ રહ્યો છે. ભારે વરસાદ બાદ કંપની દ્વારા વરસાદી પાણી સાથે કેમિકલયુક્ત પાણી છોડવામાં આવ્યું હોવાના ગંભીર આક્ષેપ સાથે આ વિરોધ પ્રદર્શન કરવામાં આવી રહ્યું છે. કંપની નજીક આવેલા આંબેડકરનગર, મોચીવાડ, કોરીપરા અને દેવીપૂજક વાસ જેવા વિસ્તારોમાં પાણી ઘૂસી જતાં અનેક પરિવારોને ભારે નુકસાન થયું હોવાનું સ્થાનિકોએ જણાવ્યું છે.

સ્થાનિકોના જણાવ્યા મુજબ, કંપની દ્વારા છોડવામાં આવેલા કેમિકલયુક્ત પાણીને કારણે રહેણાંક વિસ્તારોમાં મોટા પ્રમાણમાં પાણી ભરાઈ ગયું હતું, જે ઘરોમાં ઘૂસી જતાં ઘરવખરી, અનાજ અને કપડાં સહિતનો તમામ સામાન પલળી ગયો હતો. આના કારણે અનેક પરિવારોને મોટું આર્થિક નુકસાન વેઠવાનો વારો આવ્યો છે. આ રોષે ભરાયેલા રહીશોએ કંપની સામે મોરચો માંડીને કંપનીનો ઘેરાવ કર્યો હતો અને અસરગ્રસ્ત પરિવારોને વહેલી તકે યોગ્ય વળતર ચૂકવવાની ઉગ્ર માંગ કરી હતી.

આ વિરોધ પ્રદર્શનના બીજા દિવસે પણ કોઈપણ અનિચ્છનીય બનાવ ન બને તે માટે કાયદો અને વ્યવસ્થા જાળવવા પોલીસનો ચુસ્ત બંદોબસ્ત ગોઠવી દેવામાં આવ્યો છે. સ્થાનિકોએ જવાબદાર તંત્ર પાસે આ સમગ્ર ઘટનાની નિષ્પક્ષ તપાસ કરવાની, પીડિતોને વળતર આપવાની અને ભવિષ્યમાં આવી ગંભીર પરિસ્થિતિ ફરી ન સર્જાય તે માટે કાયમી ધોરણે યોગ્ય પગલાં ભરવાની માંગ દોહરાવી છે.

આ પ્રકારે ફેક્ટરીઓ દ્વારા છોડાતા દૂષિત પાણીથી સામાન્ય જનજીવન અને પર્યાવરણને થતા નુકસાન સામે લોકોમાં પ્રબળ આક્રોશ જોવા મળી રહ્યો છે.