ચૈત્ર માસની ભીડ બાદ તીર્થ ક્ષેત્રમાં સફાઈ અભિયાન; પિતૃ તર્પણ અને અસ્થિ વિસર્જનની વિધિઓ બે દિવસ મોકૂફ

 પુરાણ પ્રસિદ્ધ તીર્થમાં વર્ષોનો કાંપ અને કચરો દૂર કરાશે; પુરુષોત્તમ માસ પૂર્વે તંત્ર અને ટ્રસ્ટનો મોટો નિર્ણય

 નરસિંહ મહેતાના સ્મરણોથી પાવન થયેલા તીર્થમાં સફાઈ ઝુંબેશ; ટ્રસ્ટના પ્રમુખ નિલેશભાઈ પુરોહિતની યાત્રિકોને અપીલ

જૂનાગઢની ગિરનાર તળેટીમાં આવેલું અને પિતૃઓના મોક્ષ માટે પરમ પવિત્ર મનાતું દામોદર કુંડ તીર્થ ક્ષેત્ર આગામી 21 અને 22 એપ્રિલના રોજ ભાવિકો માટે બંધ રાખવાનો નિર્ણય લેવામાં આવ્યો છે. તાજેતરમાં પૂર્ણ થયેલા ચૈત્ર માસ દરમિયાન હજારો શ્રદ્ધાળુઓના ધસારા બાદ કુંડના પાણી અને ઘાટની સ્વચ્છતા જાળવવા માટે વહીવટી તંત્ર અને ટ્રસ્ટ દ્વારા આ પગલું ભરવામાં આવ્યું છે.

ઊંડાણપૂર્વક થશે સફાઈ દામોદર કુંડ તીર્થ ક્ષેત્રના પ્રમુખ નિલેશભાઈ પુરોહિતે માહિતી આપતા જણાવ્યું હતું કે, આ બે દિવસ દરમિયાન કુંડના ઘાટ પર થતી તમામ ધાર્મિક પ્રવૃત્તિઓ જેવી કે પિતૃ તર્પણ, અસ્થિ વિસર્જન અને પૂજા-અર્ચના સંપૂર્ણપણે બંધ રહેશે. સફાઈ અભિયાન હેઠળ કુંડના તળિયામાંથી વર્ષોથી જમા થયેલો કાંપ અને અન્ય કચરો દૂર કરવામાં આવશે. ત્યારબાદ 23 એપ્રિલના રોજ કુંડમાં નવું અને શુદ્ધ જળ ભરવામાં આવશે, જેના પછી શ્રદ્ધાળુઓ ફરી સ્નાન અને વિધિઓ કરી શકશે.

પુરુષોત્તમ માસની તૈયારી આ સફાઈ પાછળનું એક મુખ્ય કારણ આગામી સમયમાં આવતો પવિત્ર પુરુષોત્તમ માસ પણ છે. આ પવિત્ર માસ દરમિયાન યાત્રિકોની સંખ્યામાં અનેકગણો વધારો થતો હોય છે, તેથી તે પૂર્વે કુંડની પવિત્રતા અને શુદ્ધતા જળવાઈ રહે તે અત્યંત અનિવાર્ય છે. ગિરનારની ગોદમાં આવેલું આ તીર્થ હરિ અને હરના મિલનનું પ્રતીક મનાય છે અને અહીં અસ્થિ વિસર્જનનું વિશેષ મહત્વ હોવાથી શુદ્ધતા જાળવવી જરૂરી છે.

યાત્રિકોને નમ્ર વિનંતી ટ્રસ્ટ દ્વારા વિનંતી કરવામાં આવી છે કે દૂર-દૂરથી આવતા પ્રવાસીઓ અને શ્રદ્ધાળુઓ આ બે દિવસના બંધના નિર્ણયમાં સહકાર આપે અને પોતાની યાત્રાનું આયોજન ગુરુવાર, 23 એપ્રિલ પછી કરે. ગુરુવાર સવારથી તમામ ધાર્મિક વિધિઓ રાબેતા મુજબ શરૂ થઈ જશે.