• એસ્ટેટ શાખાની ટીમે 1000 ફૂટની જગ્યામાં ખડકાયેલું ગેરકાયદે બાંધકામ તોડી પાડ્યું - મ્યુનિસિપલ તંત્રની કડક કાર્યવાહી
• સવારે જમાતખાના બાદ બપોરે બર્ધન ચોકમાં ત્રાટકી ટીમ - પરવાનગી વગરના બાંધકામો સામે લાલ આંખ
• શહેરના વ્યસ્ત બર્ધન ચોક વિસ્તારમાં મોટી કાર્યવાહી - 1000 ફૂટની કિંમતી જગ્યા ખાલી કરાવાઈ

જામનગર મહાનગરપાલિકા દ્વારા શહેરના વિવિધ વિસ્તારોમાં મંજૂરી વગર ખડકાયેલા ગેરકાયદે બાંધકામો સામે 'ઓપરેશન ડિમોલિશન' તેજ કરવામાં આવ્યું છે. આજે શનિવારે મ્યુનિસિપલ કમિશનરના સીધા આદેશથી એસ્ટેટ શાખાની ટીમે શહેરના ભરચક ગણાતા બર્ધન ચોક વિસ્તારમાં ત્રાટકીને એક મોટી ઇમારતને જમીનદોસ્ત કરી નાખી હતી.

પરવાનગી વગર ઉભી કરી દીધી હતી ઇમારત જામનગરના બર્ધન ચોક વિસ્તારમાં આશરે 1000 ફૂટ જેટલી જગ્યામાં કોઈ પણ જાતની મંજૂરી લીધા વિના ત્રણ માળનું બાંધકામ ખડકી દેવામાં આવ્યું હતું. આ ઇમારતમાં વ્યવસાયિક હેતુ માટે દુકાનો પણ તૈયાર કરવામાં આવી હતી. મહાનગરપાલિકાના નિયમોનો ઉલાળિયો કરીને કરવામાં આવેલા આ બાંધકામ અંગે એસ્ટેટ વિભાગને જાણ થતા, આજે બપોરે જેસીબી અને શ્રમિકોના કાફલા સાથે ટીમ ઘટનાસ્થળે પહોંચી હતી અને જોતજોતામાં આખી ઇમારત તોડી પાડી હતી.

એક જ દિવસમાં બે મોટા ડિમોલિશન નોંધનીય છે કે જામનગરમાં આજે સવારથી જ તંત્ર એક્શનમાં જોવા મળ્યું હતું. સવારના સમયે એક જમાતખાનાનું મંજૂરી વગરનું બાંધકામ તોડી પાડ્યા બાદ, બપોરે બર્ધન ચોકમાં આ મોટી કાર્યવાહી કરવામાં આવી હતી. એસ્ટેટ વિભાગના અધિકારીઓની રાહબારી હેઠળ પોલીસ બંદોબસ્ત સાથે આ કામગીરી પૂર્ણ કરવામાં આવી હતી અને કિંમતી જમીન દબાણમુક્ત કરાઈ હતી.

મહાનગરપાલિકાની આ આક્રમક કાર્યવાહીને પગલે શહેરમાં અન્ય ગેરકાયદે બાંધકામો કરનારા તત્વોમાં ભારે ફફડાટ ફેલાઈ ગયો છે. આવનારા દિવસોમાં શહેરના અન્ય ભાગોમાં પણ આ પ્રકારના દબાણો હટાવવાની કામગીરી ચાલુ રહેશે તેવા સંકેત તંત્ર દ્વારા આપવામાં આવ્યા છે.