• અલ્તાફ ખફીની ફોર્મ ભરવા માટેની કાનૂની લડત – પોલીસ જાપ્તા હેઠળ નામાંકન પત્ર ભરવા માટે કરી હતી અરજી
• રિમાન્ડ હેઠળ હોવાથી જામીન માગી શકે તેમ નથી – ચૂંટણી લડવાના અધિકાર માટે સુપ્રીમ કોર્ટના ચુકાદાનો આપ્યો હવાલો
• ત્રણ FIR ના ચક્રવ્યુહમાં ફસાયેલો આરોપી ચૂંટણી મેદાને ઉતરવા આતુર – હાઈકોર્ટે નીચલી અદાલત પર છોડ્યો ફેંસલો

જામનગર મહાનગરપાલિકાની ચૂંટણીના ફોર્મ ભરવાની અંતિમ ઘડીએ એક મોટા સમાચાર સામે આવ્યા છે. ગુજસીટોક (GUJCTOC) ના આરોપી અલ્તાફ ખફી દ્વારા ગુજરાત હાઈકોર્ટમાં કરવામાં આવેલી અરજી પર સુનાવણી હાથ ધરવામાં આવી હતી. અલ્તાફ ખફીએ માંગ કરી હતી કે તેને પોલીસ જાપ્તા હેઠળ જામનગર મનપાની ચૂંટણી માટે ઉમેદવારી પત્ર ભરવા દેવા માટે રાજ્ય સરકારને આદેશ આપવામાં આવે. આ મામલે હાઈકોર્ટે નીચલી અદાલતને આદેશ આપ્યો છે કે અરજદારની અરજી પર શક્ય તેટલી વહેલી તકે એટલે કે 10 એપ્રિલ સુધીમાં નિર્ણય લેવામાં આવે.

અદાલતમાં આરોપી વતી વકીલે ધારદાર રજૂઆત કરતા જણાવ્યું હતું કે, અરજદાર હાલ પોલીસ રિમાન્ડ હેઠળ છે અને ન્યાયિક કસ્ટડીમાં ન હોવાથી તે કાયદા મુજબ જામીન માંગી શકે તેમ નથી. જોકે, ચૂંટણી લડવો એ તેનો લોકશાહી અધિકાર છે. વકીલે સુપ્રીમ કોર્ટના વિવિધ ચુકાદાઓનો હવાલો આપીને જણાવ્યું હતું કે આરોપીને ચૂંટણી માટે નામાંકન પત્ર ભરવા માટે મુક્ત કરી શકાય છે અથવા જરૂરી વ્યવસ્થા કરી શકાય છે.

અલ્તાફ ખફી વિરુદ્ધ તાજેતરમાં ત્રણ અલગ-અલગ FIR નોંધવામાં આવી છે, જેના કારણે તે કાનૂની ચક્રવ્યુહમાં ફસાયેલો છે. ફેબ્રુઆરીમાં નોંધાયેલી પ્રથમ FIR માં તેને જામીન મળ્યા હતા, પરંતુ ગુરુવારે બીજી FIR માં તેની ફરીથી ધરપકડ કરવામાં આવી હતી. વકીલે દલીલ કરી હતી કે જો આ કેસમાં જામીન મળે તો પણ 5 એપ્રિલે નોંધાયેલી ત્રીજી FIR માં તેની ધરપકડ થઈ શકે છે. ફોર્મ ભરવાની છેલ્લી તારીખ નજીક હોવાથી કોર્ટ ઝડપથી નિર્ણય લે તે જરૂરી છે.

ગુજરાત હાઈકોર્ટે આ તમામ બાબતો સાંભળ્યા બાદ સ્પષ્ટ કર્યું હતું કે અરજદારે યોગ્ય ઉપાય માટે સંબંધિત નીચલી અદાલતનો સંપર્ક કરવો જોઈએ. હાઈકોર્ટના નિર્દેશ બાદ અરજદારે હાઈકોર્ટમાંથી અરજી પાછી ખેંચી હતી. હવે સંબંધિત ફોરમ દ્વારા આજે એટલે કે શુક્રવાર સુધીમાં આ મામલે આખરી નિર્ણય લેવાનો રહેશે. ઉલ્લેખનીય છે કે, જામનગરના જ અન્ય એક ગુજસીટોક આરોપી અસલમ ખિલજીએ અગાઉ પોલીસ જાપ્તા હેઠળ જઈને ફોર્મ ભર્યું હોવાનું ઉદાહરણ પણ કોર્ટ સમક્ષ રજૂ કરાયું હતું.

રાજકોટના રાજકીય અને કાનૂની નિષ્ણાતો આ કેસ પર ઝીણવટભરી નજર રાખી રહ્યા છે, કારણ કે આ આદેશ આગામી સમયમાં અન્ય બાહુબલી ઉમેદવારો માટે એક દાખલો બની શકે છે. જામનગર મનપાના વોર્ડ 12 ના સમીકરણો હવે આ કાનૂની નિર્ણય પર ટકેલા છે. જો અલ્તાફ ખફીને ફોર્મ ભરવાની મંજૂરી મળે છે, તો જેલમાંથી ચૂંટણી લડનારા ઉમેદવારોની યાદીમાં વધુ એક નામ જોડાશે.