સિટી ન્યુઝ @ સુરેન્દ્રનગર

સુરેન્દ્રનગર, રાજકોટ રેન્જ પોલીસે સુરેન્દ્રનગર જિલ્લાના જોરાવરનગર પોલીસ સ્ટેશન વિસ્તારમાં આવેલી રતનપર રામેશ્વર ટાઉનશીપમાં મોટી કાર્યવાહી કરીને શેરબજારના ભાવ પર ગેરકાયદેસર રીતે જુગાર રમાડતા એક સક્રિય જુગારધામનો પર્દાફાશ કર્યો છે. શેરી નંબર ૪ માં આવેલા મકાન નંબર ૫૧ પર દરોડો પાડવામાં આવ્યો હતો, જે મકાન નાથુભા કાનાભા રાઠોડની માલિકીનું છે અને તેનો ભોગવટો પોલીસ કર્મચારી સંજયસિંહ નાથુભાઈ રાઠોડ ધરાવતા હતા.

દરોડા દરમિયાન પોલીસે ઘટનાસ્થળેથી દિવ્યરાજસિંહ ચુડાસમા, વિપુલભાઇ સિંધવ, અરૂણભાઇ કોઠારી, દલસુખભાઇ સિંધવ, વિજયભાઇ દેત્રોજા અને મકાનમાલિક નાથુભા રાઠોડ એમ કુલ ૬ આરોપીઓને રંગેહાથ ઝડપી લીધા હતા. આ સ્થળેથી ૧૦ લેપટોપ, ૨૯ મોબાઈલ ફોન, પેન ડ્રાઈવ અને રોકડ રકમ સહિત કુલ રૂ. ૩,૦૭,૦૦૦ નો મુદ્દામાલ જપ્ત કરવામાં આવ્યો છે.

રાજકોટ રેન્જના નાયબ પોલીસ મહાનિરીક્ષક નિર્લિપ્ત રાયની સૂચના અને માર્ગદર્શન હેઠળ આ સફળ ઓપરેશન પાર પાડવામાં આવ્યું હતું. આ ગુનામાં ૧૬ બ્રોકરો, પોલીસ કર્મચારી સંજયસિંહ રાઠોડ તથા પકડાયેલા ગ્રાહકો મળી કુલ ૨૩ આરોપીઓ સામે જોરાવરનગર પોલીસ સ્ટેશનમાં જુગાર ધારા હેઠળ ગુનો નોંધવામાં આવ્યો છે અને નાણાકીય વ્યવહારોની સઘન તપાસ માટે ફોરેન્સિક સહાય લેવાશે.

સાયબર અને નાણાકીય ગુનાઓ

શેરબજાર કે અન્ય પ્લેટફોર્મના નામે ચાલતી ગેરકાયદેસર સટ્ટાબાજી અને જુગારની પ્રવૃત્તિઓ સામે કાયદાકીય એજન્સીઓ દ્વારા સમયાંતરે કડક નિરીક્ષણ અને કાર્યવાહી કરવામાં આવતી હોય છે.