સિટી ન્યુઝ @ નવી દિલ્હી

બંગાળની ખાડીમાં સર્જાયેલું ઊંડું દબાણ હવે તીવ્ર વાવાઝોડામાં ફેરવાઈ ગયું છે. ભારતીય હવામાન વિભાગના જણાવ્યા અનુસાર, આ વાવાઝોડું ઝડપથી ઉત્તર-ઉત્તરપશ્ચિમ દિશા તરફ આગળ વધી રહ્યું છે. તેના પ્રભાવને કારણે દેશના 14 રાજ્યોમાં ભારેથી અતિભારે વરસાદનું એલર્ટ જારી કરવામાં આવ્યું છે અને તટીય વિસ્તારોમાં 60 થી 80 કિલોમીટર પ્રતિ કલાકની ઝડપે પવનો ફૂંકાઈ રહ્યા છે.

આ વાવાઝોડાની સીધી અસર ઓડિશા, આંધ્ર પ્રદેશ અને પશ્ચિમ બંગાળના દરિયાકાંઠાના વિસ્તારોમાં જોવા મળી રહી છે. સંભવિત પરિસ્થિતિને ધ્યાનમાં રાખીને સંબંધિત રાજ્ય સરકારોએ સુરક્ષાના ભાગરૂપે NDRF અને SDRF ની ટીમો તૈનાત કરી દીધી છે, તેમજ માછીમારોને દરિયો ન ખેડવાની સૂચના આપવામાં આવી છે.

વાવાઝોડાના કારણે દક્ષિણ અને પૂર્વીય રાજ્યોમાં ભારે વરસાદની ચેતવણી આપવામાં આવી છે. હવામાન વિભાગે તામિલનાડુ, કેરળ, પુડુચેરી, આંધ્ર પ્રદેશ અને કર્ણાટકમાં રેડ એલર્ટ જાહેર કર્યું છે, જ્યારે ઓડિશા, તેલંગાણા, પશ્ચિમ બંગાળ અને છત્તીસગઢમાં ઓરેન્જ એલર્ટ આપવામાં આવ્યું છે. આ ઉપરાંત ઝારખંડ અને બિહારના કેટલાક વિસ્તારોમાં 26 થી 29 ઓક્ટોબર દરમિયાન હળવાથી મધ્યમ વરસાદની શક્યતા છે.

એક તરફ દક્ષિણ અને પૂર્વ ભારતમાં વરસાદી માહોલ છે, તો બીજી તરફ ઉત્તર ભારતમાં હવામાનમાં પલટો આવ્યો છે. જમ્મુ-કાશ્મીર, હિમાચલ પ્રદેશ અને ઉત્તરાખંડના ઊંચા પહાડી વિસ્તારોમાં સક્રિય થયેલા વેસ્ટર્ન ડિસ્ટર્બન્સના કારણે હિમવર્ષા શરૂ થઈ ગઈ છે.

પહાડી વિસ્તારોમાંથી આવતા ઠંડા પવનોને લીધે ઉત્તર પ્રદેશ, બિહાર, રાજસ્થાન અને મધ્ય પ્રદેશમાં સવાર-સાંજ ગુલાબી ઠંડીનો અનુભવ થઈ રહ્યો છે. ઉત્તરાખંડના ઊંચાણવાળા વિસ્તારોમાં તાપમાનમાં મોટો ઘટાડો નોંધાતા પારો શૂન્ય ડિગ્રીની નજીક પહોંચી ગયો છે.

પહાડોમાં હિમવર્ષાથી મેદાની રાજ્યોમાં ગુલાબી ઠંડીની શરૂઆત

એક તરફ દક્ષિણ અને પૂર્વના તટીય રાજ્યોમાં વાવાઝોડાના કારણે 60 થી 80 કિલોમીટરની ઝડપે પવન અને વરસાદનું એલર્ટ છે, ત્યારે ઉત્તર ભારતમાં શિયાળાની દસ્તક થઈ ચૂકી છે. જમ્મુ-કાશ્મીર, હિમાચલ પ્રદેશ અને ઉત્તરાખંડમાં વેસ્ટર્ન ડિસ્ટર્બન્સથી હિમવર્ષા શરૂ થઈ છે. તેના પરિણામે રાજસ્થાન, મધ્ય પ્રદેશ, ઉત્તર પ્રદેશ અને બિહાર સહિતના વિસ્તારોમાં તાપમાન ઘટતાં સવાર-સાંજ ઠંડીનો ચમકારો વધ્યો છે.