રાજ્યમાં થેલેસેમિયા પીડિત બાળકો માટે જરૂરી દવાની ઉપલબ્ધતા અને ગુણવત્તાને લઈને વાલીઓમાં ચિંતા જોવા મળી રહી છે. થેલેસેમિયા માટે નિયમિત સારવાર હેઠળ રહેલા બાળકોને આયર્ન ઓવરલોડ ઘટાડવા માટે ડેસીરોક્સ સહિતની દવાઓ આપવામાં આવે છે. જોકે, ઉપલબ્ધ દવા અંગે કેટલાક વાલીઓ અને થેલેસેમિયા સાથે સંકળાયેલા લોકો દ્વારા ગંભીર આક્ષેપો કરવામાં આવી રહ્યા છે. આશરે ૫૦૦ જેટલા થેલેસેમિયા પીડિત બાળકો સારવાર હેઠળ હોવાનું જણાવવામાં આવે છે. આ બાળકો માટે સારવારમાં હેમેટોલોજિસ્ટની ભૂમિકા મહત્વપૂર્ણ છે. બીજી તરફ, ડૉ. કમલ ડીડીયા આંકડાના નિષ્ણાત તબીબ હોવા છતાં થેલેસેમિયાની સારવાર સાથે તેમનું નામ જોડવામાં આવી રહ્યું હોવાના આક્ષેપો પણ સામે આવ્યા છે. આ અંગે તબીબી તંત્ર તરફથી સ્પષ્ટતા જરૂરી બની છે. વાલીઓના જણાવ્યા અનુસાર, થેલેસેમિયા પીડિત બાળકોને આપવામાં આવતી કેસીરોક્સ (Deferasirox) દવાની ઉપલબ્ધતા અંગે સમસ્યા છે. તેમને આક્ષેપ છે કે સિવિલ હોસ્પિટલમાં ઉપલબ્ધ દીપફાર્માની ડેસીરોક્સ દવા કેટલાક બાળકોને અનુકૂળ આવતી નથી. દવા લીધા બાદ બાળકોને ઉલ્ટી થવાથી દવા શરીરમાં ટકી શક્તિ નથી અને તેની સારવારત્મક અસર થતી નથી. તેવી ફરિયાદ વાલીઓ કરી રહ્યા છે. વાલીઓનો વધુ આક્ષેપ છે કે સનફાર્માની ડેસીરોક્સ દવા બાળકોને વધુ અનુકૂળ આવે છે અને અસરકારક રહે છે,

પરંતુ આ દવા સિવિલ હોસ્પિટલમાં ઉપલબ્ધ નથી. તેમના જણાવ્યા પ્રમાણે, સનફાર્માની દવા દીપફાર્માની દવા કરતાં થોડું વધુ ખર્ચાળ છે. આ ઉપરાંત, કેસફેરલ (Desferal) ઈંજેક્શન છેલ્લા ત્રણ વર્ષથી ઉપલબ્ધ ન હોવાનો અને કેલ્ફર (Kelfer) દવા છેલ્લા આશરે આઠ મહિનાથી ઉપલબ્ધ ન હોવાનો પણ આક્ષેપ કરવામાં આવી રહ્યો છે. જો આ દવાઓ ખરેખર નિયમિત રીતે ઉપલબ્ધ ન હોય તો થેલેસેમિયા પીડિત બાળકોની સારવાર પર તેની અસર અંગે તબીબી નિષ્ણાતો પાસેથી સ્પષ્ટતા જરૂરી છે. વાલીઓનું કહેવું છે કે બાળકોને જે દવા સહન ન થાય તે જ દવા ઉપલબ્ધ કરાવીને તંત્ર માત્ર દવા ઉપલબ્ધ હોવાનો બચાવ કરી રહ્યું છે, જ્યારે બાળકોને અનુકૂળ અને જરૂરી વિકલ્પ ઉપલબ્ધ કરાવવામાં આવતો નથી. આ મામલે સિવિલ હોસ્પિટલ અને આરોગ્ય વિભાગે દવાની ગુણવત્તા, ઉપલબ્ધતા, બ્રાન્ડ બદલવાની નીતિ અને દર્દીઓની ફરિયાદો અંગે સ્પષ્ટ જવાબ આપવો જોઈએ તેવી માંગ ઉઠી છે. હવે સવાલ એ છે કે થેલેસેમિયા જેવા ગંભીર રોગથી પીડાતા બાળકો માટે દવા માત્ર કાગળ પર ઉપલબ્ધ હોવી પૂરતી છે કે પછી જે દવા દર્દીને તબીબી રીતે અનુકૂળ અને જરૂરી હોય તેની સતત ઉપલબ્ધતા સુનિશ્ચિત કરવી પણ તંત્રની જવાબદારી છે? વાલીઓની ફરિયાદોને ધ્યાનમાં લઈને આરોગ્ય વિભાગ દ્વારા સમગ્ર મામલાની તપાસ કરી, જરૂરી દવાઓની સતત ઉપલબ્ધતા અને બાળકોને થતી આડઅસર અંગે નિષ્ણાત તબીબોની સલાહ સાથે યોગ્ય નિર્ણય લેવામાં આવે તેવી માંગ ઉઠી છે.