સિટી ન્યુઝ @ વડોદરા

વડોદરા મહાનગરપાલિકાના વરસાદી ગટર પ્રોજેક્ટ શાખા દ્વારા શહેરમાં ચોમાસા પૂર્વેની કામગીરી તેજ કરવામાં આવી છે. જેના ભાગરૂપે વાઘોડિયા ચોકડીથી સિદ્ધેશ્વર હાર્બર સુધી નેશનલ હાઈવેની સમાંતર નવી વરસાદી ચેનલ બનાવવાનું કામ હાથ ધરાયું છે. આ કામગીરીને કારણે વાહનચાલકોને પડતી મુશ્કેલી નિવારવા અને કામ ઝડપથી પૂર્ણ કરવા માટે આગામી ૧૫ દિવસ સુધી આ રસ્તો બંધ રાખવાનો મહત્વનો નિર્ણય લેવામાં આવ્યો છે.

વહીવટી તંત્રના જણાવ્યા અનુસાર, PM આવાસ (ખટંબા રેસીડન્સી) પાસે હાઈવે સાથે જોડાતા ૨૭ મીટરના રસ્તાને કામચલાઉ ધોરણે બંધ કરવામાં આવ્યો છે. આ કામગીરી તા. ૧૪ મે ૨૦૨૬ થી શરૂ થશે અને આગામી ૧૫ દિવસ સુધી અથવા કામ પૂર્ણ ન થાય ત્યાં સુધી આ પ્રતિબંધ અમલમાં રહેશે. જરૂરિયાત મુજબ આ રસ્તો કાં તો સિંગલ લેન કરવામાં આવશે અથવા સંપૂર્ણપણે બંધ રાખીને વાહન વ્યવહારને વૈકલ્પિક રૂટ પર ડાયવર્ટ કરવામાં આવશે.

નેશનલ હાઈવેની સમાંતર બની રહેલી આ ચેનલથી ચોમાસા દરમિયાન વાઘોડિયા રોડ અને આસપાસના વિસ્તારોમાં ભરાતા વરસાદી પાણીના નિકાલમાં મોટી રાહત મળશે. જોકે, કામગીરી દરમિયાન સ્થાનિક રહીશો અને વાહનચાલકોને અગવડ ન પડે તે માટે તંત્ર દ્વારા અગાઉથી જ સૂચના જારી કરવામાં આવી છે. વહીવટી તંત્રે નાગરિકોને અનુરોધ કર્યો છે કે આ સમયગાળા દરમિયાન મુસાફરી માટે વૈકલ્પિક રસ્તાઓનો જ ઉપયોગ કરવો અને ટ્રાફિક વ્યવસ્થા જાળવવામાં સહકાર આપવો.

નોંધનીય છે કે, વડોદરા મનપા દ્વારા હાલ શહેરના વિવિધ વિસ્તારોમાં પ્રી-મોન્સૂન કામગીરી ચાલી રહી છે. વાઘોડિયા રોડ પરના આ મહત્વના પ્રોજેક્ટને કારણે ટ્રાફિકનું ભારણ અન્ય માર્ગો પર વધી શકે છે, જેથી પોલીસ અને ટ્રાફિક વિભાગ દ્વારા પણ વધારાની તૈનાતી કરવામાં આવશે. કામગીરી પૂર્ણ થયા બાદ આ માર્ગ ફરીથી રાબેતા મુજબ વાહન વ્યવહાર માટે ખુલ્લો મૂકવામાં આવશે.