સિટી ન્યુઝ @ તળાજા : તળાજાના રામટેકરી વિસ્તારમાં બનેલી સોની દંપતીની રહસ્યમય મોતની ઘટનામાં 12 દિવસ બાદ ચોંકાવનારો ખુલાસો થયો છે. શરૂઆતમાં દંપતીના સળગેલી હાલતમાં મૃતદેહ મળી આવતા અનેક તર્ક-વિતર્ક સર્જાયા હતા, પરંતુ પોલીસની ઊંડાણપૂર્વકની તપાસમાં ખુદ દંપતીનો સગો દીકરો અને પુત્રવધૂ જ હત્યારા હોવાનું બહાર આવ્યું છે. પોલીસે રાજકોટમાં રહેતા પુત્ર વિમલભાઈ અને પુત્રવધૂ હેતલબેન સામે હત્યાનો ગુનો નોંધી તેમની ધરપકડ કરી છે.

ઘટનાની વિગતો મુજબ, રામટેકરી વિસ્તારના એક મકાનમાંથી દંપતીના સળગેલી હાલતમાં મૃતદેહ મળતા પ્રાથમિક દ્રષ્ટિએ જ હત્યાની આશંકા સેવાઈ રહી હતી. ત્યારબાદ મૃતક દંપતીના પોસ્ટમોર્ટમનો પેનલ રિપોર્ટ આવતા તેમાં હત્યા થઈ હોવાની સત્તાવાર પુષ્ટિ થઈ હતી. પોલીસે આ મામલે કડકાઈથી તપાસ હાથ ધરતા રાજકોટ સ્થિત દીકરા અને પુત્રવધૂની સંડોવણીના પુરાવા મળ્યા હતા.

પોલીસ તપાસમાં સામે આવ્યું છે કે, દીકરા વિમલભાઈ કિશોરભાઈ વૈઠાએ પોતાના પિતાનું ગળું દબાવીને હત્યા નિપજાવી હતી. જ્યારે તેની પત્ની અને મૃતકની પુત્રવધૂ હેતલબેને માતાને ગંભીર ઈજાઓ પહોંચાડીને મોતને ઘાટ ઉતાર્યા હતા. આ ક્રૂર કૃત્ય બાદ હત્યાને અકસ્માત કે આત્મહત્યામાં ખપાવવા માટે લાશોને સળગાવી દેવામાં આવી હોવાની આશંકા પણ સેવાઈ રહી છે.

આ ગંભીર મામલે મૃતક મહિલાના સુરતમાં રહેતા ભાઈએ હિંમત દાખવીને પોતાના ભાણેજ અને ભાણેજવહુ વિરુદ્ધ પોલીસ ફરિયાદ નોંધાવી છે. ફરિયાદના આધારે પોલીસે તાત્કાલિક કાર્યવાહી કરીને બંને આરોપીઓની ધરપકડ કરી લીધી છે. સગા પુત્ર દ્વારા જ પિતાની અને વહુ દ્વારા સાસુની હત્યા કરવાના આ કિસ્સાએ સમગ્ર પંથકમાં અરેરાટી મચાવી દીધી છે.

તળાજા પોલીસ હાલ પકડાયેલા દંપતીની પૂછપરછ કરી રહી છે કે આ હત્યા પાછળનું સાચું કારણ શું હતું. મિલકતનો વિવાદ કે કોઈ પારિવારિક અણબનાવ આ હત્યા માટે જવાબદાર છે કે કેમ તે દિશામાં તપાસ તેજ કરવામાં આવી છે. 12 દિવસ સુધી ચાલેલા આ મર્ડર મિસ્ટ્રીના અંતે હત્યારાઓ પકડાઈ જતાં કાયદો અને વ્યવસ્થાની સ્થિતિ વધુ મજબૂત બની છે.