સિટી ન્યૂઝ @ જૂનાગઢ: જૂનાગઢ શહેરની સરહદો હવે વન્યપ્રાણીઓના કાયમી નિવાસસ્થાન અને વિહારધામ બની રહી હોય તેવું દ્રશ્ય સામે આવ્યું છે. ગઈકાલે 4 May ના રોજ રાત્રિના સમયે ગિરનાર દક્ષિણ રેન્જ હેઠળ આવતા જૂનાગઢ-બિલખા રોડ પર સ્થિત પાવરહાઉસ વિસ્તારમાં વન્યજીવોના અદભૂત દર્શન થયા હતા. અહીં બે સિંહણ પોતાના નાના બચ્ચાઓ સાથે અચાનક મુખ્ય માર્ગ પર આવી ચડી હતી. વન્યજીવોની આ હિલચાલની જાણ થતા જ વન વિભાગનો સ્ટાફ તાત્કાલિક હરકતમાં આવ્યો હતો અને વન્યજીવોની સુરક્ષા માટે કામગીરી હાથ ધરી હતી.

વન વિભાગના કર્મચારીઓએ સિંહ પરિવારને રસ્તો ઓળંગતા જોઈ અત્યંત સમયસૂચકતા વાપરી હતી. સિંહો ગભરાઈ ન જાય અને કોઈ અકસ્માત ન સર્જાય તે માટે રસ્તાની બંને બાજુએ આવતા-જતા વાહનોને થોભાવી દેવામાં આવ્યા હતા. વાહનોની હેડલાઇટના પ્રકાશ વચ્ચે, સિંહ પરિવારે અત્યંત નિરાંતે અને સુરક્ષિત રીતે મુખ્ય માર્ગ ઓળંગ્યો હતો. વન વિભાગની ટીમ ત્યાં ખડેપગે રહીને સતત મોનિટરિંગ કરતી રહી હતી. આ ઘટનાના દ્રશ્યો સોશિયલ મીડિયામાં વાયરલ થતા લોકો વન વિભાગની કામગીરીના મન ભરીને વખાણ કરી રહ્યા છે.

જૂનાગઢ શહેર ગિરનારના જંગલ સાથે સીધું જોડાયેલું હોવાથી અહીં સિંહો અને અન્ય વન્યજીવોની અવરજવર હવે સામાન્ય બની ગઈ છે. વર્ષ 2025 ની વન્યજીવ ગણતરી મુજબ, ગિરનારના જંગલમાં સિંહોની સંખ્યામાં નોંધપાત્ર વધારો થયો છે અને હવે અહીં 54 થી વધુ સિંહો વસવાટ કરે છે. વસ્તીમાં થયેલા આ વધારાને કારણે સિંહો હવે ખોરાક અને નવા ટેરિટરીની શોધમાં વારંવાર શહેરની સીમમાં કે હાઈવે પર દેખાય છે, જે વન્યજીવ પ્રેમીઓ માટે ખુશીના સમાચાર છે.

ખાસ કરીને ધરાનગર રોડથી બિલખા તરફ જતો માર્ગ જંગલની બોર્ડર પર હોવાથી ત્યાં અગાઉ પણ સિંહ પરિવારની લટારના અનેક કિસ્સાઓ નોંધાયા છે. વન્યજીવો જ્યારે મુખ્ય માર્ગ પર આવે છે, ત્યારે વાહનોના ઘોંઘાટ અને લાઈટોથી તેઓ દિશાહીન બની જવાની શક્યતા રહે છે. આવી નાજુક સ્થિતિમાં માર્ગ અકસ્માતો નિવારવા અને મનુષ્ય-વન્યજીવ સંઘર્ષ ટાળવા માટે વન વિભાગ દ્વારા વિશેષ તકેદારી રાખવામાં આવે છે. ડુંગર દક્ષિણ રેન્જના અધિકારીઓ દ્વારા આ વિસ્તારમાં રાત્રિ પેટ્રોલિંગ પણ વધારી દેવામાં આવ્યું છે.

ગઈકાલની ઘટનામાં વન વિભાગના ગાર્ડ્સની સતર્કતાને કારણે સિંહ પરિવાર કોઈ પણ ખલેલ વગર જંગલના અંદરના ભાગમાં પરત ફરી શક્યો હતો. વન વિભાગે જે રીતે વાહનોને રોકીને વનરાજોને રાજવી સન્માન સાથે રસ્તો કરી આપ્યો, તે તેમની કર્તવ્યનિષ્ઠા અને વન્યજીવો પ્રત્યેની સંવેદનાનું ઉત્તમ ઉદાહરણ પૂરું પાડે છે. સ્થાનિક રહીશો અને મુસાફરોએ પણ વન વિભાગને સહકાર આપી વાહનો થંભાવી દીધા હતા, જે દર્શાવે છે કે જૂનાગઢની જનતામાં પણ વન્યજીવો પ્રત્યે આદર અને જાગૃતિ વધી છે.