રિલાયન્સ ફાઉન્ડેશન સંચાલિત પડાણા વેટરનરી હોસ્પિટલે 10 વર્ષમાં 3 લાખથી વધુ અબોલ જીવોની નિઃશુલ્ક સેવા કરી છે.

હોસ્પિટલની 10મી વર્ષગાંઠ અને અનંત અંબાણીના 31મા જન્મદિન નિમિત્તે 16 એપ્રિલે પશુપાલન પરિસંવાદ યોજાશે.

દરરોજ સરેરાશ 155 અને વાર્ષિક 55 હજારથી વધુ પશુ-પક્ષીઓની 24x7 સારવાર કરવામાં આવે છે.

જામનગરના પડાણા ગામે રિલાયન્સ ફાઉન્ડેશન દ્વારા સામાજિક ઉત્તરદાયિત્વ (CSR) હેઠળ શરૂ કરવામાં આવેલી વેટરનરી હોસ્પિટલે સફળતાપૂર્વક 10 વર્ષ પૂર્ણ કર્યા છે. રિલાયન્સ ઇન્ડસ્ટ્રીઝના એક્ઝિક્યુટિવ ડાયરેક્ટર અનંત અંબાણીના માર્ગદર્શન અને જીવદયાના અભિગમ સાથે કાર્યરત આ હોસ્પિટલે છેલ્લા એક દાયકામાં 3 લાખથી વધુ અબોલ જીવોની નિઃશુલ્ક સારવાર કરીને એક ઐતિહાસિક સીમાચિહ્ન હાંસલ કર્યો છે.

વર્ષ 2016માં રિલાયન્સના ધનરાજભાઈ નથવાણીના નેતૃત્વમાં શરૂ થયેલી આ હોસ્પિટલ આજે પશુપાલકો માટે આશીર્વાદ સમાન બની છે. અહીં નિષ્ણાત પશુ ચિકિત્સકોની ટીમ દ્વારા મેડિસિનલ, સર્જિકલ અને ગાયનેકોલોજિકલ બીમારીઓની અદ્યતન સાધનો દ્વારા સારવાર કરવામાં આવે છે. છેલ્લા ત્રણ વર્ષમાં હોસ્પિટલના કાર્યક્ષેત્રમાં મોટો વધારો થયો છે, જ્યાં હવે વાર્ષિક 55 હજારથી વધુ પશુ-પક્ષીઓનું નિદાન કરવામાં આવે છે. હોસ્પિટલ પાસે જટિલ કેસો માટે 12 બેડની ઇન્ડોર સારવાર સુવિધા પણ ઉપલબ્ધ છે.