સિટી ન્યૂઝ @ જામનગર: દેશના વડાપ્રધાન નરેન્દ્ર મોદી આગામી 10 Mayના રોજ જામનગરના મહેમાન બનવા જઈ રહ્યા છે. વડાપ્રધાનના આગમનને પગલે હાલ જામનગર શહેરમાં ભારે ઉત્સાહ અને હરખની હેલી જોવા મળી રહી છે. ભાજપ સંગઠન અને વહીવટી તંત્ર દ્વારા વડાપ્રધાનના સ્વાગત માટે એરપોર્ટથી લાલ બંગલા સર્કલ સુધીના માર્ગ પર ભવ્ય રોડ-શોનું આયોજન કરવામાં આવ્યું છે. આ પ્રવાસની સૌથી મહત્વની બાબત એ છે કે વડાપ્રધાન જામનગરમાં રાત્રિ રોકાણ કરવાના હોવાથી સ્થાનિક તંત્ર દ્વારા સુરક્ષાના તમામ પાસાઓ પર વિશેષ ધ્યાન આપવામાં આવી રહ્યું છે.

વડાપ્રધાનના રોડ-શોની રૂપરેખા મુજબ, એરપોર્ટથી લાલ બંગલા સુધીના નિર્ધારિત રૂટ પર અલગ-અલગ અંતરે 3 ભવ્ય સ્ટેજ તૈયાર કરવામાં આવશે. આ સ્ટેજ પરથી નરેન્દ્ર મોદી જામનગરના નાગરિકોનું અભિવાદન ઝીલશે. સમગ્ર માર્ગને વિશેષ લાઈટિંગ અને સુશોભનથી શણગારવાની કામગીરી શરૂ કરી દેવામાં આવી છે. જામનગરના રહેવાસીઓમાં પોતાના લોકપ્રિય નેતાને નિહાળવા માટે અત્યારથી જ ઉત્સુકતા જોવા મળી રહી છે અને મોટી સંખ્યામાં જનમેદની ઉમટી પડે તેવી શક્યતા છે.

સુરક્ષા વ્યવસ્થાને સુનિશ્ચિત કરવા માટે જિલ્લા પોલીસ વડા રવિ મોહન સૈની અને મ્યુનિસિપલ કમિશનર ડી.એન. મોદીના નેતૃત્વમાં ઉચ્ચ અધિકારીઓના કાફલાએ રોડ-શોના રૂટનું બારીકાઈથી નિરીક્ષણ કર્યું હતું. આ રૂટ નિરીક્ષણ દરમિયાન શહેર ભાજપ પ્રમુખ મીનાબેન કોઠારી અને અધિક કલેક્ટર સહિતના વહીવટી અધિકારીઓ હાજર રહ્યા હતા. અધિકારીઓએ પ્રોટોકોલ મુજબ સુરક્ષા બંદોબસ્ત અને ટ્રાફિક વ્યવસ્થાપન અંગે ઝીણવટભરી ચર્ચા કરી હતી જેથી કોઈ પણ પ્રકારની ખામી ન રહી જાય.

વડાપ્રધાન નરેન્દ્ર મોદી 10 May ની રાત્રે જામનગરના ઐતિહાસિક સર્કિટ હાઉસ ખાતે મુકામ કરે તેવી પ્રબળ શક્યતા છે. વડાપ્રધાનના રોકાણને ધ્યાનમાં રાખીને સર્કિટ હાઉસમાં અત્યારે નવીનીકરણની કામગીરી પૂરજોશમાં ચાલી રહી છે. એસપીજી (SPG) અને સ્થાનિક પોલીસ દ્વારા સર્કિટ હાઉસની આસપાસના વિસ્તારમાં ચુસ્ત પોલીસ પહેરો ગોઠવી દેવામાં આવ્યો છે. જામનગરનું આ સર્કિટ હાઉસ રાજવી કાળની સ્મૃતિઓ ધરાવતું હોવાથી પીએમનું અહીં રોકાણ યાદગાર બની રહેશે.

આગામી 11 May ના રોજ સોમનાથ ખાતે યોજાનાર કાર્યક્રમમાં જતા પૂર્વે વડાપ્રધાન જામનગરના લોકો સાથે સંવાદ સાધશે. જામનગર ભાજપ દ્વારા રોડ-શોને યાદગાર બનાવવા માટે સાંસ્કૃતિક કાર્યક્રમોનું પણ આયોજન કરવામાં આવ્યું છે. વહીવટી તંત્ર દ્વારા એરપોર્ટથી લઈને છેક શહેરના મુખ્ય માર્ગો સુધી સુરક્ષાના લોખંડી બંદોબસ્તની સાથે સાથે નાગરિકોને કોઈ તકલીફ ન પડે તે માટે વૈકલ્પિક રૂટની પણ વ્યવસ્થા કરવામાં આવી છે. પીએમના આ પ્રવાસથી જામનગરના રાજકીય અને સામાજિક વર્તુળોમાં ભારે ગરમાવો જોવા મળી રહ્યો છે.