મુસાફરો માટે ખુશખબર: સવારે 11:25 વાગ્યે જામનગરથી મુંબઈ માટે ઉડાન ભરશે વિમાન; ‘ઉડાન 2.0’ યોજના હેઠળ મહત્વનો માઈલસ્ટોન

 વિકસિત ભારત 2047 ના વિઝન તરફ વધુ એક ડગલું- પ્રધાનમંત્રી મોદીના નેતૃત્વમાં જામનગરને મળી આધુનિક પરિવહનની ભેટ

 નાગરિક ઉડ્ડયન મંત્રીના મુસાફરકેન્દ્રિત અભિગમનું પરિણામ; જામનગરથી મુંબઈ જતી ફ્લાઇટ 6E 5151 મુસાફરો માટે આશીર્વાદરૂપ

જામનગર: જામનગર એરપોર્ટ અને સ્થાનિક રહેવાસીઓ માટે ૨૩ એપ્રિલ ૨૦૨૬ નો દિવસ એક મહત્વપૂર્ણ સીમાચિહ્નરૂપ સાબિત થયો છે. ઇન્ડિગો એરલાઇન્સ દ્વારા મુંબઈ અને જામનગર વચ્ચે દૈનિક ફ્લાઇટ સેવાની શરૂઆત કરવામાં આવી છે. આ નવી સેવાથી જામનગર સહિત સમગ્ર સૌરાષ્ટ્ર વિસ્તારની હવાઈ કનેક્ટિવિટીમાં નોંધપાત્ર વધારો થશે, જેનો સીધો લાભ સ્થાનિક ઉદ્યોગકારો, પ્રવાસીઓ અને સામાન્ય નાગરિકોને મળશે.

નવી સેવાના સમયપત્રક મુજબ, ફ્લાઇટ ૬E ૫૧૫૦ મુંબઈથી સવારે ઉડાન ભરી ૧૦:૩૫ વાગ્યે જામનગર પહોંચશે. ત્યારબાદ, પરત જતી ફ્લાઇટ ૬E ૫૧૫૧ જામનગર એરપોર્ટથી સવારે ૧૧:૨૫ વાગ્યે મુંબઈ માટે પ્રસ્થાન કરશે. આ સમયપત્રક એ રીતે ગોઠવવામાં આવ્યું છે કે જે વ્યવસાયિક કામ અર્થે મુંબઈ જતા લોકો તેમજ મનોરંજન હેતુસર મુસાફરી કરતા મુસાફરો માટે અત્યંત અનુકૂળ રહેશે. આ સમયગાળા દરમિયાન મુસાફરોને મુંબઈથી કનેક્ટિંગ ફ્લાઇટ્સ મેળવવામાં પણ સરળતા રહેશે.

ઇન્ડિગોની આ નવી સેવા ભારત સરકારની ‘UDAN 2.0’ (ઉડે દેશ કા આમ નાગરિક) યોજના હેઠળ શરૂ કરવામાં આવી છે. આ યોજનાનો મુખ્ય ઉદ્દેશ્ય સામાન્ય નાગરિકો માટે હવાઈ મુસાફરીને વધુ સુલભ અને સસ્તી બનાવવાનો છે. નાગરિક ઉડ્ડયન મંત્રી કે. રામ મોહન નાયડુના મુસાફરકેન્દ્રિત અભિગમને કારણે જામનગર જેવા પ્રાદેશિક કેન્દ્રોને મુખ્ય શહેરો સાથે જોડવા પર ભાર મૂકવામાં આવ્યો છે. આ પહેલથી મુસાફરોને વધુ સારી કનેક્ટિવિટી અને ગુણવત્તાયુક્ત સેવા પ્રાપ્ત થશે.

આ સફળતા પ્રધાનમંત્રી નરેન્દ્ર મોદીના ‘વિકસિત ભારત ૨૦૪૭’ ના વિઝન સાથે સુસંગત છે, જેમાં આધુનિક ઇન્ફ્રાસ્ટ્રક્ચર અને સરળ પરિવહન વ્યવસ્થાને પ્રાધાન્ય આપવામાં આવ્યું છે. મુંબઈ સાથેની આ સુધારેલી કનેક્ટિવિટીથી જામનગરના વેપાર અને ઉદ્યોગ જગતને નવી ગતિ મળશે. રિલાયન્સ અને નાયરા જેવી મોટી રિફાઈનરીઓના કારણે જામનગરનું મહત્વ વૈશ્વિક સ્તરે છે, ત્યારે આ ફ્લાઇટ સેવા આંતરરાષ્ટ્રીય મુસાફરો માટે પણ કડીરૂપ સાબિત થશે.

ઇન્ડિગો જેવી પ્રીમિયમ એરલાઇન્સનું જામનગરમાં આગમન એરપોર્ટના વધતા મહત્વ અને ક્ષમતાને દર્શાવે છે. જામનગર એરપોર્ટ પ્રશાસન મુસાફરોને સુરક્ષિત અને કાર્યક્ષમ સેવાઓ પ્રદાન કરવા માટે કટિબદ્ધ છે. આગામી સમયમાં જો મુસાફરોનો પ્રતિસાદ સારો રહેશે તો અન્ય શહેરો સાથેની કનેક્ટિવિટીમાં પણ વધારો કરવામાં આવે તેવી શક્યતા છે. આ નવી ફ્લાઇટ સેવાથી સૌરાષ્ટ્રના આર્થિક વિકાસના નવા દ્વાર ખુલશે તેવી આશા સેવાઈ રહી છે.