સિટી ન્યુઝ @ મુંબઈ

મુંબઈ, વાસી અને બિનઆરોગ્યપ્રદ ખાદ્યચીજોના મામલે મુંબઈમાં તંત્ર સક્રિય બન્યું છે. મહારાષ્ટ્ર ફૂડ વિભાગ દ્વારા ક્રિકેટ ક્લબ ઓફ ઈન્ડિયા, બાંદ્રા ઈસ્ટ સ્થિત એમઆઈજી ક્રિકેટ ક્લબ તથા અન્ય ત્રણ ક્લબના ફૂડ લાયસન્સ સસ્પેન્ડ કરી દેવામાં આવ્યા છે. ખાદ્ય સુરક્ષા તથા આરોગ્યપ્રદ નિયમોના ભંગ બદલ આ કડક કાર્યવાહી કરવામાં આવી છે. તપાસ દરમિયાન ક્રિકેટ ક્લબ ઓફ ઈન્ડિયાના કિચનમાં શાકાહારી તથા માંસાહારી ભોજન એક જ સ્થળે બનતું હોવાનું અને ત્યાં વાંદા-જીવાત તથા માખીઓ મળી આવ્યા હોવાનું સામે આવ્યું છે. નવનિયુક્ત ફૂડ કમિશનર તુકારામ મુંઢે દ્વારા અન્ય સંખ્યાબંધ જાણીતી રેસ્ટોરાં સામે પણ આકરી કાર્યવાહી કરવામાં આવી છે.

તપાસમાં ક્રિકેટ ક્લબ ઓફ ઈન્ડિયાના કોલ્ડ સ્ટોરેજ સહિતના સ્થળોએથી વાસી શાકભાજી, સડેલા મશરૂમ તથા એક્સપાયર્ડ ખાદ્યચીજો પણ મળી આવી હતી. આ ઉપરાંત, રસોડામાં વાસણો જમીન પર રાખવામાં આવ્યા હતા અને ખાદ્યચીજો બનાવવાની જગ્યાએ પાણી ભરાયેલું રહેતું હતું. અનેકવિધ નિયમભંગ બદલ ફૂડ વિભાગે ત્વરિત પગલાં લઈને લાયસન્સ સસ્પેન્ડ કરી દીધા છે. નાગરિકોના સ્વાસ્થ્યની સુરક્ષા માટે તંત્રની આ લાલ આંખથી હોટેલ અને રેસ્ટોરાં સંચાલકોમાં મોટો ફફડાટ ફેલાઈ ગયો છે.

આરોગ્ય અને સુરક્ષા

નાગરિકોના સ્વાસ્થ્ય સાથે ચેડાં અટકાવવા માટે ખાદ્ય સુરક્ષાના ધોરણોનું કડક પાલન કરવું દરેક ખાદ્ય વ્યવસાય સાથે જોડાયેલા એકમ માટે અનિવાર્ય છે.