સિટી ન્યુઝ @ જામનગર : દિવાળીના તહેવારો દરમિયાન લોકો સુરક્ષિત રીતે અવરજવર કરી શકે અને રસ્તા પર કાયદો-વ્યવસ્થા જળવાઈ રહે તે માટે જામનગર જિલ્લા પોલીસ દ્વારા એક સ્પેશિયલ ટ્રાફિક ડ્રાઇવનું આયોજન કરવામાં આવ્યું હતું.

રાજકોટ વિભાગના આઈજી નિર્લિપ્ત રાય અને એસપી ડૉ. રવિ મોહન સૈનીના માર્ગદર્શન હેઠળ હાથ ધરાયેલી આ કાર્યવાહીમાં ભીડવાળા વિસ્તારો અને મુખ્ય રસ્તાઓ પર સઘન વાહન ચેકિંગ કરવામાં આવ્યું હતું.

આ ડ્રાઇવ દરમિયાન કારમાં બ્લેક ફિલ્મ લગાવવાના 44, નંબર પ્લેટ વગરના 69, ફેન્સી નંબર પ્લેટના 43 અને મોડિફાઇડ સાયલન્સરના 5 કેસ સહિત અનેક નિયમભંગ પકડાયા હતા.

પોલીસે નશામાં વાહન ચલાવવા બદલ 9 અને બેફિકરાઈથી વાહન ચલાવવા બદલ 10 કેસ નોંધવા ઉપરાંત મોટર વ્હીકલ એક્ટ હેઠળ કુલ 14 વાહનો ડિટેઇન કર્યા હતા અને સ્થળ પરથી 80,400 રૂપિયાનો દંડ વસૂલ્યો હતો.

તહેવારોની મોસમમાં અકસ્માતો નિવારવા અને ટ્રાફિક નિયમોનું કડક પાલન કરાવવા માટે પોલીસ તંત્ર દ્વારા આગામી દિવસોમાં પણ આ પ્રકારની ડ્રાઇવ જારી રાખવામાં આવશે.

તહેવારોમાં ટ્રાફિક નિયંત્રણ અને પોલીસની સઘન ડ્રાઇવ

દિવાળી જેવાસૌથી મોટા તહેવાર ટાણે બજારોમાં અને રસ્તાઓ પર થતી ભારે ભીડને ધ્યાનમાં રાખીને જામનગર પોલીસે કરેલી આ કામગીરી અત્યંત પ્રશંસનીય છે. વાહનો પર બ્લેક ફિલ્મ, ફેન્સી નંબર પ્લેટ, મોડિફાઇડ સાયલન્સર અને નશાની હાલતમાં વાહન હંકારવા જેવા ગંભીર ગુનાઓ સીધા જ માર્ગ સલામતી સામે જોખમ ઊભા કરતા હોય છે. પોલીસની આ કડક ડ્રાઇવ માત્ર દંડ વસૂલવા પૂરતી સીમિત નથી, પરંતુ તે બેફામ વાહનચાલકોમાં કાયદાનો ડર પેદા કરીને સામાન્ય નાગરિકોની દિવાળી સુસંગત અને સુરક્ષિત બનાવવાનો એક મહત્વપૂર્ણ પ્રયાસ છે.