૧૫ કિલોમીટરની મર્યાદા અને સમાન કાર્યભાર સાથે નવી ગાઈડલાઈન જાહેર

વહીવટી કામગીરીમાં સુધારા સાથે શિક્ષકો માટે નવી જોગવાઈઓ અમલી

દિવ્યાંગ શિક્ષકોને મળી મોટી રાહત, કામકાજના દિવસોની થઈ સમાન વહેંચણી

સિટી ન્યુઝ @ ગાંધીનગર

ગુજરાત સરકારના શિક્ષણ વિભાગ દ્વારા રાજ્યની સરકારી પ્રાથમિક શાળાઓના વહીવટને વધુ સુદ્રઢ બનાવવા માટે મુખ્ય શિક્ષકોને વધારાનો ચાર્જ સોંપવાના નિયમોમાં મોટો ફેરફાર કરવામાં આવ્યો છે. અગાઉ ગત ૧૭ જાન્યુઆરીએ બહાર પાડવામાં આવેલા પરિપત્રમાં રહેલી વહીવટી ક્ષતિઓને દૂર કરી સરકારે તદ્દન નવી નીતિ અમલમાં મૂકી છે. આ નિર્ણયથી જે શાળાઓમાં HTAT પાસ મુખ્ય શિક્ષકની જગ્યાઓ ખાલી છે, ત્યાં વહીવટી કાર્યભારની વ્યવસ્થા વધુ પારદર્શક બનશે.

નવા નિયમો અનુસાર, શાળાના સૌથી વરિષ્ઠ અને અનુભવી શિક્ષકને જ મુખ્ય શિક્ષક તરીકેનો ચાર્જ સોંપવામાં આવશે. જો નજીકની શાળામાં આ પદ ખાલી હોય, તો હવે ૧૫ કિલોમીટરની ત્રિજ્યા સુધીની શાળામાં ચાર્જ સોંપી શકાશે. આ ઉપરાંત, એકસાથે બે શાળાઓની જવાબદારી સંભાળતા શિક્ષકો માટે શિક્ષણ વિભાગે વિશેષ ટાઈમ-ટેબલ તૈયાર કર્યું છે, જેમાં અઠવાડિયાના ૬ દિવસોને મૂળ શાળા અને ચાર્જવાળી શાળા વચ્ચે ૩-૩ દિવસની સમાન વહેંચણી કરવામાં આવી છે. આ વ્યવસ્થાથી કોઈ પણ શાળાના શૈક્ષણિક કાર્યમાં અવરોધ આવશે નહીં.

શિક્ષણ વિભાગે આ નવા પરિપત્રમાં માનવીય અભિગમ અપનાવી દિવ્યાંગ શિક્ષકોને વહીવટી જવાબદારીઓમાંથી મુક્તિ આપી છે. જોકે, અન્ય શિક્ષકો માટે નિયમો કડક બનાવવામાં આવ્યા છે; જે શિક્ષક ચાર્જ લેવાનો ઇનકાર કરશે, તેમની સામે વહીવટી પગલાં લેવાશે. સરકાર દ્વારા સ્પષ્ટ કરવામાં આવ્યું છે કે આ હંગામી વ્યવસ્થા છે, જેનો લાભ કે બદલી વખતે સિનિયોરિટીમાં ગણતરી થશે નહીં, પરંતુ ઇન્ચાર્જ તરીકે વધારાનું ભથ્થું આપવામાં આવશે. આ નવી જોગવાઈથી શાળાઓના સંચાલનમાં ગુણવત્તા અને પારદર્શિતા આવશે તેવી અપેક્ષા છે.

મુખ્ય બદલાવ એક નજરે

નવા અને જૂના નિયમો વચ્ચેનો તફાવત અત્યંત મહત્વનો છે. અગાઉ ૧૦ કિલોમીટરની ત્રિજ્યામાં ૨ કે તેથી વધુ શાળાઓનો ચાર્જ આપી દેવાતો હતો, જેનાથી શિક્ષકો પર કામનું ભારણ વધી જતું હતું. હવે આ મર્યાદા વધારીને ૧૫ કિલોમીટર કરવામાં આવી છે અને માત્ર એક જ શાળાનો ચાર્જ આપી શકાશે. આ ફેરફારથી શાળાઓની વહીવટી કાર્યક્ષમતા વધવાની સાથે મુખ્ય શિક્ષકોના માનસિક અને કાર્યકારી દબાણમાં પણ નોંધપાત્ર ઘટાડો થશે.