સિટી ન્યુઝ @ ભાવનગર 

ગુજરાત રાજ્ય માર્ગ પરિવહન નિગમ (GSRTC) દ્વારા ઉનાળાના વેકેશન દરમિયાન પ્રવાસ કરી રહેલા હજારો મુસાફરોને મોટી રાહત આપતો એક મહત્વપૂર્ણ નિર્ણય જાહેર કરવામાં આવ્યો છે. રાજ્યમાં નવા હાઇવે અને એક્સપ્રેસ રૂટ તૈયાર થવાના કારણે અગ્રણી શહેરો વચ્ચે મુસાફરીનું અંતર નોંધપાત્ર રીતે ઘટ્યું છે. આ ભૌગોલિક પરિવર્તનનો સીધો આર્થિક લાભ પ્રવાસીઓને આપવા માટે એસટી નિગમ દ્વારા પ્રીમિયમ વોલ્વો બસ સેવાઓના ભાડામાં મોટો ઘટાડો કરવાની સત્તાવાર જાહેરાત કરવામાં આવી છે.

નવા રૂટ અને સુધારેલા ભાડા પત્રક અનુસાર, અમદાવાદથી ભાવનગર વચ્ચે નવા શોર્ટ-કટ હાઇવેના કારણે અંતર ઓછું થતાં અગાઉ ₹351 રહેલું વોલ્વોનું ભાડું હવે ઘટાડીને ₹337 કરવામાં આવ્યું છે, જે મુસાફરોને ₹14 નો સીધો લાભ આપશે. તે જ રીતે, અમદાવાદના નહેરુનગરથી સુરત વચ્ચે કાર્યરત નવા એક્સપ્રેસ હાઇવેના કારણે મુસાફરી વધુ ઝડપી અને ટૂંકી બની છે. પરિણામે સુરત રૂટના ભાડામાં ₹61 નો તોતિંગ ઘટાડો કરાયો છે, જેનાથી અગાઉનું ₹748 નું ભાડું હવે માત્ર ₹687 થઈ ગયું છે.

આ ફેરફારો ખાસ કરીને મુસાફરોની માનીતી વોલ્વો બસ સેવાઓમાં લાગુ કરવામાં આવ્યા હોવાથી મધ્યમ અને ઉચ્ચ મધ્યમ વર્ગના હજારો દૈનિક મુસાફરોને વધુ સુવિધા સાથે ઓછા ખર્ચે આરામદાયક સફર કરવાની ઉત્તમ તક મળશે. બીજી તરફ, વેકેશનની સીઝનને ધ્યાનમાં રાખીને એસટી નિગમ દ્વારા ગઈકાલથી જ રાજ્યભરમાં વધારાની 300 નવી અદ્યતન બસો દોડાવવાનું શરૂ કરી દેવામાં આવ્યું છે. આ નવી બસો જોડાવાથી એસટી સ્ટેન્ડો પર જોવા મળતી ભીડમાં મોટો ઘટાડો થશે અને મુસાફરો સરળતાથી પોતાના વતન પહોંચી શકશે.

અમદાવાદ એસટી નિગમના પ્રો શ્રદ્ધાબેન ભટ્ટે આ અંગે વધુ માહિતી આપતા જણાવ્યું હતું કે, વડાપ્રધાન નરેન્દ્ર મોદીની વૈશ્વિક ઇંધણ સંકટ વચ્ચે ડીઝલ બચાવવાની ખાસ અપીલ અને રાજ્ય સરકારના સીધા માર્ગદર્શન હેઠળ એસટી નિગમ સજ્જ બન્યું છે. નિગમ દ્વારા કિંમતી ઇંધણનો બગાડ અટકાવવા માટે તમામ ડ્રાઇવરોને ખાસ તાલીમ આપવામાં આવી રહી છે. બસોની ગતિ મર્યાદા જાળવવા, રનવે કે હાઈવે પર અચાનક બ્રેક મારવાનું ટાળવા અને બસનું Kmpl (કિલોમીટર પ્રતિ લીટર) એવરેજ વધારવા માટે દરેક ડિવિઝનમાં કડક મોનિટરિંગ સિસ્ટમ શરૂ કરવામાં આવી છે.

પીએમ મોદીની અપીલ બાદ સરકારી એસટી બસોનો વપરાશ વધ્યો

વડાપ્રધાન નરેન્દ્ર મોદી દ્વારા દેશના નાગરિકોને ખાનગી વાહનોનો બિનજરૂરી વપરાશ ઘટાડીને ઇંધણ સંયમ રાખવાની અપીલ કર્યા બાદ રાજ્યમાં સરકારી પરિવહનનો ઉપયોગ ખૂબ જ ઝડપથી વધ્યો છે. એસટી નિગમના સત્તાવાર અહેવાલ મુજબ ઉનાળાના વેકેશન અને પીએમની અપીલના સંયુક્ત પ્રભાવથી એસટી પ્રવાસીઓની સંખ્યામાં 4% નો મોટો ઉછાળો નોંધાયો છે. આ આંકડાકીય વધારાને કારણે ગત 11 મેથી અત્યાર સુધીના ટૂંકા ગાળામાં જ નિગમના ચોપડે 1 લાખથી વધુ નવા પેસેન્જરો ઉમેરાયા છે, જે પર્યાવરણ અને નિગમ બંને માટે ફાયદાકારક છે.