સિટી ન્યુઝ @ જામનગર :  જામનગર શહેરના રણજીતસાગર ડેમ નજીક આવેલા લોકપ્રિય ફોરેસ્ટ રિસોર્ટમાં આજે અચાનક ભયાનક આગ ફાટી નીકળતા ચકચાર મચી ગઈ હતી. લગ્ન પ્રસંગની સીઝન હોવાથી રિસોર્ટમાં મોટી સંખ્યામાં મહેમાનો હાજર હતા, તે દરમિયાન આગ લાગતા લોકોમાં ભારે નાસભાગ અને અફરાતફરીના દ્રશ્યો જોવા મળ્યા હતા.

પ્રાપ્ત વિગતો અનુસાર, આગ સૌપ્રથમ રિસોર્ટના રેસ્ટોરન્ટ વિભાગમાં લાગી હતી અને જોતજોતામાં તેણે વિકરાળ સ્વરૂપ ધારણ કરી લીધું હતું. આ વિકરાળ આગની લપેટમાં રિસોર્ટનું આખું રેસ્ટોરન્ટ અને તેની સામે જ ઉભો કરવામાં આવેલો લગ્ન પ્રસંગનો મંડપ તથા ડોમ સંપૂર્ણપણે બળીને ખાખ થઈ ગયા હતા. જ્યારે આ દુર્ઘટના બની ત્યારે નજીકમાં જ મહેમાનો માટે જમણવાર ચાલી રહ્યો હતો, પરંતુ સમયસૂચકતાના કારણે કોઈ મોટી જાનહાનિ થઈ નથી.

ઘટનાની જાણ થતાં જ જામનગર ફાયર બ્રિગેડનો કાફલો બે ફાયર ફાઈટર સાથે સ્થળ પર પહોંચી ગયો હતો. ફાયર ઓફિસર અનવર ગજજણની આગેવાનીમાં ટીમ દ્વારા પાણીનો મારો ચલાવીને આગ પર કાબૂ મેળવવામાં આવ્યો હતો. પોલીસનો કાફલો પણ વ્યવસ્થા જાળવવા માટે સ્થળ પર દોડી આવ્યો હતો.

ફાયર વિભાગના જણાવ્યા અનુસાર, પ્રાથમિક દ્રષ્ટિએ આગ લાગવાનું કારણ શોર્ટ સર્કિટ હોવાનું જણાય છે. સદભાગ્યે કોઈ વ્યક્તિને ઈજા કે જાનહાનિ થઈ નથી, પરંતુ રિસોર્ટની મિલકતને વ્યાપક આર્થિક નુકસાન પહોંચ્યું છે. હાલમાં આ મામલે પોલીસ અને ફાયર વિભાગ દ્વારા વધુ તપાસ હાથ ધરવામાં આવી છે.