સુરત: આગામી ૧ મે, ૨૦૨૬ના રોજ ગુજરાત ગૌરવ દિનની રાજ્ય કક્ષાની ભવ્ય ઉજવણી સુરતના આંગણે થવા જઈ રહી છે. આ અવસરે ડુમ્મસ સી-ફેસ ખાતે સાંસ્કૃતિક કાર્યક્રમો અને પોલીસ પરેડનું આયોજન કરાયું છે, જેમાં મુખ્યમંત્રી ભૂપેન્દ્ર પટેલ ખાસ ઉપસ્થિત રહેશે. જંગી જનમેદની અને ટ્રાફિક વ્યવસ્થાને ધ્યાને રાખી સુરત મહાનગરપાલિકાની સિટિલિંક સેવાએ ૧૧થી વધુ બસ રૂટોમાં મોટા ફેરફારો અને ડાયવર્ઝન જાહેર કર્યા છે. પોલીસ કમિશનરના જાહેરનામા મુજબ એસ.કે. નગરથી એરપોર્ટ અને SVNIT સર્કલ સુધીના માર્ગો પર સવારે ૮:૦૦ વાગ્યાથી તમામ વાહનોની અવર-જવર અને પાર્કિંગ પર પ્રતિબંધ રહેશે.

ટ્રાફિક ડાયવર્ઝનના કારણે BRTS અને સિટી બસ સેવામાં વ્યાપક અસર જોવા મળશે. ૧લી મેના રોજ સવારથી કાર્યક્રમ પૂર્ણ થાય ત્યાં સુધી BRTS રૂટ નં. ૧૨ (ઓએનજીસીથી સરથાણા) હવે માત્ર સોમેશ્વરથી સરથાણા સુધી જ ચલાવવામાં આવશે. તેવી જ રીતે રૂટ નં. ૧૪ (ઓએનજીસી કોલોનીથી કોસાડ) ને પાલ RTOથી કોસાડ સુધી જ મર્યાદિત રાખવાનો નિર્ણય લેવાયો છે. આ ફેરફારો મુસાફરોની સુરક્ષા અને ટ્રાફિકના સુચારુ નિયમન માટે કરવામાં આવ્યા છે.

સિટી બસ સેવાની વાત કરીએ તો, એરપોર્ટ અને ડુમ્મસ તરફ જતાં કુલ ૭ રૂટોને સંપૂર્ણપણે બંધ રાખવામાં આવશે. જેમાં રૂટ નં. ૧૦૬૨, ૧૩૬, ૧૫૩R, ૨૦૬, ૨૧૬B, ૨૧૬A અને ૨૨૬J નો સમાવેશ થાય છે. જોકે, મુસાફરોની સુવિધા જળવાઈ રહે તે માટે રૂટ નં. ૧૨૬૨ ને જોગર્સ પાર્ક થઈને અને રૂટ નં. ૭૦૬ ને સાયન્સ સેન્ટર થઈને ડાયવર્ટ કરવામાં આવ્યા છે, જ્યારે રૂટ નં. ૭૧૬ સરદાર બ્રીજ થઈને દોડશે.

સિટિલિંક તંત્ર દ્વારા વધુમાં જણાવવામાં આવ્યું છે કે ૧લી મેના રોજ અન્ય રૂટો પર પણ બસોની ફ્રિકવન્સી સામાન્ય કરતાં ઓછી રહેશે. ટ્રાફિક પોલીસની સૂચના મુજબ જો જરૂર જણાશે તો આ રૂટોમાં તાત્કાલિક ધોરણે વધુ ફેરફારો પણ કરવામાં આવી શકે છે. આથી, સુરત મહાનગરપાલિકાએ તમામ શહેરીજનોને અગાઉથી આ કામચલાઉ ફેરફારોની નોંધ લેવા અને તે મુજબ મુસાફરીનું આયોજન કરવા વિનંતી કરી છે.

નોંધનીય છે કે સુરત મહાનગરપાલિકા દ્વારા શહેરમાં ૧૦૮ કિમીના BRTS કોરીડોર અને ૪૧૮ કિમીના સિટી બસ રૂટ પર કુલ ૮૨૫થી વધુ બસોનું સંચાલન કરવામાં આવે છે. ગુજરાત ગૌરવ દિનની રાજ્ય કક્ષાની ઉજવણી સુરત માટે ગૌરવની બાબત હોવાથી વહીવટી તંત્ર દ્વારા તેને સફળ બનાવવા માટે અત્યારથી જ પૂરતી તૈયારીઓ કરવામાં આવી છે. આ આંતરરાષ્ટ્રીય સ્તરના કાર્યક્રમમાં કોઈ પણ પ્રકારની અવ્યવસ્થા ન સર્જાય તે માટે પરિવહન સેવાના આ ફેરફારો અનિવાર્ય બન્યા છે.