સિટી ન્યુઝ @ જૂનાગઢ

જૂનાગઢ મહાનગરપાલિકા (મનપા) ફરી એકવાર વ્યાપક ગેરરીતિઓ અને વિવાદોના વંટોળમાં સપડાઈ છે. સ્થાનિક સ્તરે ચાલતી ઘોર બેદરકારી, લાપરવાહી અને કથિત ભ્રષ્ટાચારને લઈને આ વખતે કોઈ વિપક્ષી નેતાએ નહીં, પરંતુ ખુદ શાસક પક્ષ ભાજપના જ જૂનાગઢના ધારાસભ્ય સંજય કોરડીયાએ વહીવટી તંત્ર સામે સીધો મોરચો માંડ્યો છે. ધારાસભ્ય દ્વારા મહાનગરપાલિકાના કમિશનરને અત્યંત કડક અને ધારદાર શબ્દોમાં એક સત્તાવાર પત્ર લખવામાં આવ્યો છે, જેને પગલે જૂનાગઢના સ્થાનિક રાજકારણમાં ભારે ગરમાવો આવી ગયો છે.

ધારાસભ્ય સંજય કોરડીયાએ કમિશનરને પાઠવેલા આ પત્રમાં મુખ્યત્વે જૂનાગઢ શહેરના બિસ્માર બનેલા રોડ-રસ્તા અને તેની અત્યંત ધીમી ગતિએ ચાલતી કામગીરીને લઈને ગંભીર સવાલો ઉઠાવ્યા છે. તેમણે આક્ષેપ કર્યો છે કે, આખા શહેરમાં રસ્તાઓ બનાવવા માટે જે ખાનગી એજન્સીને મોટો કોન્ટ્રાક્ટ આપવામાં આવ્યો છે, તેની પાસે આટલું મોટું ભગીરથ કામ કરવાની કોઈ તકનીકી ક્ષમતા, લાયકાત કે આવડત જ નથી. લાંબો સમય વીતી ગયો હોવા છતાં કોન્ટ્રાક્ટર દ્વારા એકપણ વિસ્તારનું કામ વ્યવસ્થિત રીતે પૂરું કરવામાં આવ્યું નથી.

શહેરમાં હાલ ચાલી રહેલી વેરવિખેર કામગીરીને લીધે સામાન્ય જનતા છેલ્લા 2 થી 3 મહિનાથી ભારે હાલાકીનો સામનો કરી રહી છે. જુદા જુદા વોર્ડ અને રહેણાંક વિસ્તારોમાં મુખ્ય રસ્તાઓ ખોદીને મહિનાઓ સુધી ખાડાઓ એમનેમ જ પડ્યા રાખવામાં આવે છે અને અધૂરું કામ મૂકીને એજન્સીના માણસો ગાયબ થઈ જાય છે. ધારાસભ્યએ પત્રમાં જવાબદાર અધિકારીઓ અને કોન્ટ્રાક્ટર વચ્ચે મોટું આર્થિક સેટિંગ અને મિલીભગત હોવાનો ખુલ્લો આક્ષેપ કર્યો છે, જેના કારણે પ્રજાના ટેક્સના કરોડો રૂપિયા સરકારી મંજૂરી સાથે પાણીમાં જઈ રહ્યા છે.

પત્રમાં સૌથી મોટો ધડાકો કરોડો રૂપિયાના ટેન્ડરોમાં થયેલી વહીવટી ગેરરીતિઓને લઈને કરવામાં આવ્યો છે. સંજય કોરડીયાના મતે, મનપા દ્વારા જે ટેન્ડરો જાહેર કરાયા તેમાં જરૂરી નકશાઓ અને અંદાજો એટલે કે પ્લાન એસ્ટીમેટની વિગતો જાણીજોઈને છુપાવવામાં આવી છે. ચોક્કસ માપ સાઈઝ અને એન્જિનિયરિંગ નકશા વિના કોઈ પણ કામ નિયમ મુજબ કઈ રીતે થઈ શકે અને નકશા વગર એજન્સીના કરોડો રૂપિયાના ફાઈનલ બિલ કઈ રીતે પાસ કરી દેવાયા તે અંગે તેમણે કમિશનર સમક્ષ જવાબ માગ્યો છે.

અગાઉના પત્રો પર કોઈ એક્શન નહીં: કૌભાંડો દબાવવાનો પ્રયાસ

ધારાસભ્ય સંજય કોરડીયાએ અગાઉ પણ જૂનાગઢ કલેક્ટરને પત્ર લખીને પોતાના મતવિસ્તારના વિકાસ કામોમાં ભયંકર ભ્રષ્ટાચાર આચરાયો હોવાના ગંભીર આક્ષેપો કર્યા હતા, પરંતુ તંત્ર દ્વારા હજુ સુધી કોઈ તપાસ કરાઈ નથી. એટલું જ નહીં, જૂનાગઢ તાલુકા પંચાયત હેઠળના ગામોમાં જે તલાટી મંત્રીઓ અને સેક્શન અધિકારીઓએ ભ્રષ્ટાચાર આચર્યો હતો, તેમને જ તપાસ સોંપીને આખા કૌભાંડ પર પડદો નાખી દેવામાં આવ્યો હતો. હાલમાં ભાજપના જ ધારાસભ્યનો પોતાની સરકાર શાસિત મનપા સામેનો આ આક્રમક પત્ર જાહેર જનતામાં ચર્ચાની એરણે ચડ્યો છે.