• શિવા ચૌહાણ, પ્રદીપ રાઠોડ અને રાજુ સાંખટ રેસમાં મોખરે; કોંગ્રેસના સૂપડા સાફ.
• વિજેતા ઉમેદવારોમાં લોબિંગ શરૂ, ઉપપ્રમુખ પદ માટે પણ અનેક નામોની ચર્ચા.
• મોખડકા, કમળેજ અને કળસારના વિજેતા ઉમેદવારો પ્રમુખની દાવેદારીમાં ચર્ચામાં.

ભાવનગર જિલ્લા પંચાયતની તાજેતરમાં યોજાયેલી ચૂંટણીના પરિણામો જાહેર થતા જ ભારતીય જનતા પાર્ટીએ વિરોધ પક્ષોના સૂપડા સાફ કરી પ્રચંડ બહુમતી હાંસલ કરી છે. 28 એપ્રિલના રોજ જાહેર થયેલા પરિણામોમાં જિલ્લા પંચાયતની કુલ 40 બેઠકોમાંથી ભાજપે 36 બેઠકો પર ભગવો લહેરાવીને સત્તા જાળવી રાખી છે. આ ભવ્ય વિજય બાદ હવે જિલ્લા પંચાયતના સર્વોચ્ચ એવા પ્રમુખ અને ઉપપ્રમુખ પદ પર કોની વરણી થશે તેને લઈ રાજકીય વર્તુળોમાં ભારે ચર્ચાઓ જાગી છે.

પ્રમુખ પદની રેસમાં હાલ ત્રણ મુખ્ય નામો મોખરે ચાલી રહ્યા છે. જેમાં મોખડકા બેઠક પરથી વિજેતા થયેલા શિવાભાઈ ઝવેરભાઈ ચૌહાણ, કમળેજ બેઠક પરથી પ્રદીપ ઠાકરશીભાઈ રાઠોડ અને કળસાર બેઠક પરથી વિજય મેળવનાર રાજુભાઈ મુળુભાઈ સાંખટના નામોની જોરશોરથી ચર્ચા થઈ રહી છે. પક્ષના હાઈકમાન્ડ દ્વારા જ્ઞાતિ સમીકરણો અને અનુભવને આધારે આમાંથી કોઈ એક નામ પર મહોર મારવામાં આવે તેવી શક્યતા છે.

બીજી તરફ, ઉપપ્રમુખ પદ માટે પણ અનેક વિજેતા ઉમેદવારો મેદાને છે. વરતેજ બેઠકના સુરેન્દ્રસિંહ વનરાજસિંહ ગોહિલ, સણોસરા બેઠકના સોનલબેન સંજયભાઈ વાઘાણી તેમજ ઉમરાળાના સુજાનસિંહ મુલુજી ગોહિલના નામો ચર્ચામાં છે. આ ઉપરાંત દિહોર બેઠક પરથી હરપાલસિંહ પરમાર અને મોરચંદ બેઠકના લગધીરસિંહ ગોહિલ પણ ઉપપ્રમુખ પદની દાવેદારી માટે સક્રિય જણાઈ રહ્યા છે. પક્ષમાં આંતરિક રીતે નામોની પેનલ તૈયાર કરવાની પ્રક્રિયા તેજ બની છે.

ચૂંટણીના આંકડાકીય પરિણામો પર નજર કરીએ તો, ભાજપે અલંગ, બગદાણા, તળાજા, પાલિતાણા અને ગારિયાધાર જેવી મહત્વની તમામ બેઠકો પર કબજો જમાવ્યો છે. ભાજપના આ પ્રચંડ વાવાઝોડા સામે કોંગ્રેસ માત્ર 2 બેઠકો (પાળી અને નાની રાજસ્થળી) પૂરતી સીમિત રહી ગઈ છે. જ્યારે ચમરડી અને પાટણા બેઠક પર અપક્ષ ઉમેદવારોએ જીત મેળવી છે. આમ, વિરોધ પક્ષ માટે જિલ્લા પંચાયતમાં અસ્તિત્વ ટકાવવું પણ મુશ્કેલ બન્યું છે.

ભાવનગર જિલ્લા પંચાયતમાં ભાજપની આ એકતરફી જીત પક્ષની મજબૂત કેડર અને જનતાના વિશ્વાસનું પ્રતીક માનવામાં આવે છે. હવે આગામી દિવસોમાં ભાજપ સંગઠન દ્વારા પ્રમુખ અને ઉપપ્રમુખના નામોની સત્તાવાર જાહેરાત કરવામાં આવશે. પક્ષમાં જૂથબંધી ન સર્જાય અને વિકાસના કામો વેગવંતા બને તેવા ચહેરાને જ સુકાન સોંપવામાં આવશે તેવું સૂત્રો જણાવી રહ્યા છે. જિલ્લાભરના કાર્યકરો અને નાગરિકોની નજર હવે નવા શાસકોની વરણી પર ટકેલી છે.