સિટી ન્યુઝ @ મોરબી

ચોમાસાની વિદાય અને શિયાળાના આગમન વચ્ચેના આ મિશ્ર ઋતુના સમયમાં માનવ સ્વાસ્થ્ય પર માઠી અસર પડી રહી છે, કારણ કે દિવસ દરમિયાન આકરો તાપ અને વહેલી સવારે કે મોડી રાત્રે હળવી ઠંડીનો અહેસાસ થઈ રહ્યો છે. આવી બદલાતી સ્થિતિમાં વિશેષ કરીને નાના બાળકોની રોગ પ્રતિકારક શક્તિ ઘટે છે, જેના કારણે શરદી, ઉધરસ અને ઝાડા-ઉલ્ટીના કેસોમાં અચાનક મોટો વધારો જોવા મળી રહ્યો છે. ગુજરાતના મોરબી શહેરમાં આ મિશ્ર ઋતુને કારણે જન આરોગ્યની સ્થિતિ ગંભીર રીતે પ્રભાવિત થઈ રહી છે.

આઈ.એમ.એ. (IMA) ના સેક્રેટરી ડો. ધર્મેશ ભાલોડિયાના અંદાજ મુજબ હાલમાં શહેરમાં રોજના તાવ, શરદી અને ઉધરસ જેવી વાયરલ બીમારીઓના આશરે 250 થી 300 જેટલા કેસો રોજ નોંધાઈ રહ્યા છે. તેમાંય ખાસ કરીને બાળકોમાં છેલ્લા એક માસ દરમિયાન ઝાડા-ઉલ્ટીનું પ્રમાણ ચિંતાજનક રીતે વધ્યું છે. એક માસમાં સરેરાશ બાળકોમાં રોજના ઝાડા-ઉલ્ટીના અંદાજિત 200 કેસો સામે આવ્યા છે. બાળકોમાં કુદરતી રીતે જ રોગ પ્રતિકારક શક્તિ ઓછી હોય છે અને ઉપરથી ઋતુ પરિવર્તનને કારણે ખોરાકમાં થતા ફેરફારો તથા દૂષિત પાણીના લીધે આંતરડામાં ઇન્ફેક્શન થવાથી આ બીમારીઓ વકર્યાનું બાળ રોગ નિષ્ણાતો અનુમાન લગાવી રહ્યા છે.

સામાન્ય રીતે તાવ, શરદી અને ઉધરસને મોસમી વાયરલ ગણી શકાય, પરંતુ બાળકોમાં ઝાડા-ઉલ્ટીના કેસો આટલી ઝડપથી વધવા એ ખરેખર એક ગંભીર બાબત છે. વાયરલ બીમારીઓના આ પ્રકોપના પગલે મોરબીના નાના-મોટા ક્લિનિક્સ અને હોસ્પિટલો દર્દીઓથી સતત ભરાયેલા રહે છે. દર્દીઓની આ ભીડને કારણે ડોક્ટરો, પેરામેડિકલ સ્ટાફ અને મેડિકલ સ્ટોરના સંચાલકો માટે આ સિઝન ખૂબ જ વ્યસ્ત સાબિત થઈ રહી છે અને દવાની દુકાનો પર પણ ભારે ભીડ જોવા મળી રહી છે.

બીજી તરફ મેલેરિયાના કેસો અંગે વાત કરતા ડો. ધર્મેશ ભાલોડિયાએ જણાવ્યું હતું કે મોરબીમાં મેલેરિયાના જે કેસો સામે આવ્યા છે તે મોરબી બહારથી આવ્યા છે. ઉદાહરણ તરીકે કોઈ વિદ્યાર્થી કે નોકરી કરતી વ્યક્તિ અમદાવાદ કે અન્ય સ્થળેથી મેલેરિયાગ્રસ્ત થઈને મોરબી આવ્યા હોય અને અહીં સારવાર અર્થે પહોંચ્યા ત્યારે આ ગંભીરતા પ્રકાશમાં આવી છે. આમ છતાં સ્થાનિક તંત્ર દ્વારા સાવચેતીના પગલાં લેવા અનિવાર્ય બન્યા છે.

બાળકોને આ સિઝલ બીમારીઓથી સુરક્ષિત રાખવા માટે વિશેષ તકેદારી રાખવી જરૂરી છે. બાળકોને ઠંડા પીણા, બરફ કે બહારનો ખુલ્લો ખોરાક ન આપવો જોઈએ, પાણી અને દૂધ ઉકાળીને પીવડાવવા, તડકામાં બહાર મોકલવાનું ટાળવું અને પૌષ્ટિક આહાર આપવો જોઈએ. આ ઉપરાંત કોરોના સમયની જેમ માસ્કનો ઉપયોગ કરવો અને માંદગીવાળા વ્યક્તિઓથી યોગ્ય અંતર જાળવવું જેથી પરિવારના અન્ય સભ્યો સુરક્ષિત રહી શકે.

સ્વાસ્થ્ય અને ઋતુગત જાગૃતિ

ઋતુ બદલાવના આ સમયગાળા દરમિયાન પોતાના સ્વાસ્થ્ય પ્રત્યે જાગૃત રહીને યોગ્ય આહાર અને સાવચેતી અપનાવવાથી ગંભીર બીમારીઓથી સુરક્ષિત રહી શકાય છે.