સિટી ન્યુઝ @ મુંબઈ

બોલિવૂડની પ્રખ્યાત નિર્માતા એકતા કપૂરની સુપર નેચરલ થ્રિલર ફ્રેન્ચાઈઝી 'રાગિણી એમએમએસ' ફરી એકવાર ચર્ચામાં છે. 'રાગિણી થ્રી'ના નિર્માણની જાહેરાત બાદ હવે તેમાં મોટા ફેરફારોના અહેવાલ મળી રહ્યા છે. અગાઉ એવી ચર્ચા હતી કે તમન્ના ભાટિયા આ ફિલ્મમાં મુખ્ય હિરોઈન તરીકે જોવા મળશે, પરંતુ હવે તાજા અહેવાલો મુજબ, એકતા કપૂરે કાસ્ટિંગમાં ફેરફાર કરીને નરગિસ ફખરી અને આયુષ શર્માની નવી જોડી પર પસંદગી ઉતારી છે.

નરગિસ ફખરી છેલ્લા કેટલાક સમયથી મોટા પડદાથી દૂર છે, તેથી આ મોટા પ્રોજેક્ટમાં તેની એન્ટ્રી ચાહકો માટે આશ્ચર્યજનક માનવામાં આવી રહી છે. એક અહેવાલ મુજબ, નરગિસ આ ફિલ્મમાં એક મજબૂત પોલીસ અધિકારીની ભૂમિકા ભજવતી જોવા મળશે. આયુષ શર્મા, જેણે પોતાની એક્શન ફિલ્મોથી ઓળખ બનાવી છે, તે હવે આ હોરર-થ્રિલર ડ્રામામાં કેવા રોલમાં દેખાશે તે જાણવા ચાહકો આતુર છે.

કાસ્ટિંગની સાથે સાથે ફિલ્મના દિગ્દર્શનમાં પણ ફેરફાર થયો છે. અગાઉ સાહિર રઝા આ ફિલ્મનું નિર્દેશન કરવાના હતા, પરંતુ હવે એકતા કપૂરે આ જવાબદારી શશાંક ઘોષને સોંપી છે. શશાંક ઘોષ 'વીરે દી વેડિંગ' અને 'ફ્રેડી' જેવી ફિલ્મો માટે જાણીતા છે, તેથી તેમની પાસેથી 'રાગિણી થ્રી'માં કંઈક નવું અને રોમાંચક જોવા મળે તેવી અપેક્ષા છે.

ઉલ્લેખનીય છે કે રાગિણી ફ્રેન્ચાઈઝી તેની બોલ્ડ અને ડરામણી વાર્તા માટે પ્રખ્યાત છે. હવે નવી સ્ટારકાસ્ટ અને નવા ડિરેક્ટર સાથે આ ફિલ્મ બોક્સ ઓફિસ પર કેવો જાદુ ચલાવે છે તે જોવું રહ્યું. ફિલ્મનું શૂટિંગ ટૂંક સમયમાં શરૂ થવાની સંભાવના છે.