રાજકોટ, મંગળવાર, 17 જૂન 2025: અમદાવાદમાં થયેલી ગમખ્વાર વિમાન દુર્ઘટના બાદ, મૃતદેહોની ઓળખ માટેની DNA મેચિંગ પ્રક્રિયા અંતિમ તબક્કામાં છે. રાજ્ય સરકારે આ કપરા સમયમાં અત્યંત સંવેદનશીલ અભિગમ અપનાવીને અમદાવાદ સિવિલ મેડિસિટીના કસોટી ભવન ખાતે એક ડેડિકેટેડ કમાન્ડ સેન્ટર સ્થાપિત કર્યું હતું, જ્યાં 24X7 ધોરણે સેમ્પલિંગ પ્રક્રિયા હાથ ધરવામાં આવી રહી છે. આરોગ્ય તંત્ર અને વહીવટી તંત્ર આ ‘કસોટી’માં ખરું ઊતર્યું હોવાનું સામે આવ્યું છે.
સંવેદનશીલ અભિગમ અને ત્વરિત કાર્યવાહી
મુખ્યમંત્રી ભૂપેન્દ્ર પટેલ અને વરિષ્ઠ મંત્રીઓના નેતૃત્વ હેઠળ, દુર્ઘટનાના તત્કાળ બાદ જ BJ મેડિકલ કોલેજના કસોટી ભવન ખાતે મૃતદેહોની ઓળખ માટે જરૂરી DNA મેચિંગ પ્રક્રિયા માટે સ્વજનોના DNA સેમ્પલિંગની કામગીરી યુદ્ધના ધોરણે શરૂ કરવામાં આવી હતી. આ પ્રક્રિયા વહેલી તકે અને સંવેદનશીલતા સાથે પૂર્ણ કરવા માટે માઇક્રોબાયોલોજિસ્ટની 5 નિષ્ણાત ટીમોની રચના કરવામાં આવી હતી.
પરિવારજનો માટે વ્યાપક વ્યવસ્થા
પ્રોજેક્ટ ઇમ્પ્લિમેન્ટેશન યુનિટ (PIU) ને જવાબદારી સોંપવામાં આવી હતી કે તે તમામ જરૂરી વ્યવસ્થાઓ જેવી કે બેસવાની સુવિધા, શુદ્ધ પીવાનું પાણી, ચા-કોફી વગેરે સંપૂર્ણ સંવેદનશીલતા સાથે સુનિશ્ચિત કરે, જેથી શોકમગ્ન પરિજનો અને મુલાકાતીઓને યથાસંભવ આરામ અને સન્માનજનક વાતાવરણ મળી શકે. હોસ્પિટલ સંકુલ અને કસોટી ભવનની આજુબાજુ સતત વધતી લોકોની સંખ્યાને સુવ્યવસ્થિત રીતે નિયંત્રિત કરવા તથા શાંતિ અને કાયદો-વ્યવસ્થા જાળવી રાખવા માટે પોલીસ વિભાગને પણ નિર્દેશો અપાયા હતા.
માનસિક સહાય અને ડેટા પારદર્શિતા
આ મુશ્કેલ અને લાગણીશીલ ક્ષણોમાં પરિવારજનોને માનસિક સહાય આપવા તથા માર્ગદર્શન પૂરું પાડવા માટે મનોચિકિત્સકો તથા કાઉન્સેલરોની ટીમ પણ સ્થળ પર તૈનાત કરવામાં આવી છે. કોઈ પણ પ્રકારના શોક કે ગભરાટથી ઉત્પન્ન થનાર પરિસ્થિતિમાં ત્વરિત પ્રાથમિક સારવાર આપવા માટે ફર્સ્ટ એઇડ ટીમ પણ તૈયાર રાખવામાં આવી છે.
જે પરિજનો પોતે ઉપસ્થિત નથી રહી શકતા, તેવી પરિસ્થિતિમાં તેમના ઘરેથી જ DNA સેમ્પલ કલેક્શન માટે યોગ્ય વ્યવસ્થા કરવામાં આવી હતી. રાજ્ય સરકારની તમામ ટીમો તરફથી એ સુનિશ્ચિત કરવાનો દરેક શક્ય પ્રયત્ન કરવામાં આવી રહ્યો છે કે કોઈ પણ પરિવાર આ મહત્વની પ્રક્રિયાથી વંચિત ન રહે અને દરેક પીડિતને સન્માનપૂર્વક ઓળખ, ન્યાય તથા લાગણીશીલ સપોર્ટ પ્રાપ્ત થઈ શકે.
રાજ્ય સરકારે આ કપરા સમયમાં સંપૂર્ણ સંવેદનશીલતા સાથે ગુમ થયેલ વ્યક્તિઓના પરિજનો માટે રહેવા-જમવાની યોગ્ય વ્યવસ્થા પણ સુનિશ્ચિત કરી છે. અમદાવાદની બી. જે. મેડિકલ કોલેજ, આરોગ્ય વિભાગ તથા કલેક્ટર કચેરીની વિવિધ ટીમો રાહત અને બચાવ કામગીરીમાં સતત સમર્પણ ભાવ સાથે જોડાયેલી છે. એર ઈન્ડિયાની ટીમ પણ અસરગ્રસ્ત પરિવારોને જરૂરી માહિતી આપવા અને દરેક શક્ય સહકાર આપવા માટે સ્થળ પર ઉપલબ્ધ છે.
આ કટોકટીભરી પરિસ્થિતિમાં તમામ પ્રકારના ડેટાને રીયલ-ટાઇમમાં અપડેટ કરવાની પણ વ્યવસ્થા કરવામાં આવી છે, જેથી કોઈ પણ પ્રકારની ભ્રામક માહિતી ન ફેલાય. સિવિલ હોસ્પિટલમાં કસોટી ભવન ખાતે મૃતકોના DNA સેમ્પલ્સ તથા સ્ટાફિંગની પ્રક્રિયા સ્ટેટ કંટ્રોલ રૂમના સંકલનમાં 24×7 કાર્યરત છે.
