રાજકોટ, [જૂન ૯, ૨૦૨૫]: ૩૫ દિવસના લાંબા ઉનાળુ વેકેશન બાદ આજથી રાજ્યભરની શાળાઓમાં નવા શૈક્ષણિક સત્રનો પ્રારંભ થઈ ગયો છે. વેકેશન પૂરું થતાં જ શાળાઓ ફરી ધમધમતી થઈ ગઈ છે અને બાળકોના કલરવથી શાળા પરિસર ગુંજી ઉઠ્યા છે. વિદ્યાર્થીઓમાં ભારે ઉત્સાહ જોવા મળ્યો હતો.
લાંબા સમય બાદ શાળાએ પહોંચેલા વિદ્યાર્થીઓના ચહેરા પર ઉત્સાહ સ્પષ્ટપણે દેખાઈ રહ્યો હતો. નવા પુસ્તકો, નવા મિત્રો અને નવા વર્ગખંડનો રોમાંચ બાળકોમાં જોવા મળ્યો હતો. બીજી તરફ, નવું શૈક્ષણિક સત્ર શરૂ થતાં જ સ્ટેશનરીની દુકાનો તેમજ યુનિફોર્મ અને સ્કૂલ શૂઝની દુકાનો પર પણ ભારે ભીડ જોવા મળી રહી છે. વાલીઓ પોતાના બાળકો માટે જરૂરી સામાન ખરીદવામાં વ્યસ્ત જોવા મળ્યા હતા.
શૈક્ષણિક કેલેન્ડર જાહેર: પ્રથમ સત્રમાં ૧૦૫ દિવસનો અભ્યાસ
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSHSEB) દ્વારા નવા શૈક્ષણિક વર્ષ ૨૦૨૫-૨૬ માટેનું કેલેન્ડર પણ જાહેર કરી દેવામાં આવ્યું છે. આ કેલેન્ડર અનુસાર, પ્રથમ સત્રમાં કુલ ૧૦૫ દિવસનું શૈક્ષણિક કાર્ય રહેશે. ત્યારબાદ ૨૧ દિવસનું દિવાળી વેકેશન રહેશે. દિવાળી વેકેશન પછી, બીજા સત્રની શરૂઆત ૬ નવેમ્બર, ૨૦૨૫ થી થશે, જેમાં ૧૪૪ દિવસનું શૈક્ષણિક કાર્ય રહેશે. આ ઉપરાંત, આગામી વર્ષ ૨૦૨૬ માટે ૪ મે થી ૭ જૂન સુધી ઉનાળુ વેકેશન રહેશે.
