ગાંધીનગરથી આદેશ આવતાં રાજકોટની સિવિલમાં રખડતાં શ્વાનને પકડવા તંત્રની દોડધામ…

ગુજરાતની સરકારી હોસ્પિટલોમાં છેલ્લા ઘણા સમયથી રખડતા શ્વાનનો આતંક હોય તેવા વીડિયો વાયરલ થયા બાદ હરકતમાં આવેલ રાજ્ય સરકારના આરોગ્ય વિભાગે સૂચના આપતાં રાજકોટની સિવિલ હોસ્પિટલમાં સવારથી જ તંત્ર હરકતમાં આવી જતા શ્વાનને ડબ્બે પૂરવાનું શરૂ કર્યું હતું. પ્રાપ્ત વિગત મુજબ, ભૂતકાળમાં રાજકોટ પીડિયુ સિવિલ હોસ્પિટલમાં રખડતા શ્ર્વાનના અનેક વીડિયો વાયરલ થયા હતા. ત્યાર બાદ થોડા સમય પહેલા જ સૌરાષ્ટ્ર અને ગુજરાતના અન્ય સરકારી હોસ્પિટલમાં પણ શ્વાનનો ત્રાસ વધી રહ્યો હોય અને દર્દીઓને પણ મુશ્કેલી થતી હોય તેના પણ વીડિયો વાયરલ થયો હતો. ત્યાર બાદ ગઇ કાલે ગાંધીનગરથી આરોગ્ય વિભાગ વીડિયો કોન્ફરન્સ મારફતે તમામ સિવિલ હોસ્પિટલમાં રખડતા શ્ર્વાનને દૂર કરવા અંગે સૂચના આપવામાં આવી હતી. જેના પગલે આજ સવારથી જ સિવિલ અને કોર્પોરેશન તંત્ર હરકતમાં આવી ગયું હતું અને સિવિલ પ્રાંગણમાં રખડતા શ્વાનને પકડી પકડીને ડબ્બામાં પૂરી દેવામાં આવ્યા હતા.