રાજકોટમાં PGVCL કચેરી બહાર આંદોલન કરી રહેલા ઉમેદવારો- NSUI કાર્યકરોને ટીંગાટોળી કરી પોલીસ લઈ ગઈ

રાજકોટ PGVCL દ્વારા વિદ્યુત સહાયકની ભરતી ન કરવામાં આવતા NSUIની આગેવાનીમાં ઉમેદવારો છેલ્લા 4 દિવસથી ધરણાં પર બેઠા હતા. ત્યારે આજે આંદોલનનો પાંચમો દિવસ હતો. દરમિયાન બપોરના સમયે પોલીસ કાફલો આવી પહોંચ્યો હતો. ‘ધરણાની મંજૂરી લીધી નથી, તમે હવે અહીં બેસી નહીં શકો’ કહી NSUIના પ્રદેશ પ્રમુખ સહિતનાં કાર્યકરો તેમજ ઉમેદવારોને ટીંગાટોળી કરી પોલીસ દ્વારા ઉઠાવી લેવાયા હતા. તમામ ઉમેદવારોને એક પછી એક પકડીને પોલીસ બસમાં બેસાડી અટકાયત કરી લેવામાં આવી હતી. ઉલ્લેખનીય છે કે વિદ્યુત સહાયકની ભરતીને લઇ છેલ્લા 5 દિવસથી 300 યુવાનો આંદોલનનો માર્ગ અપનાવી PGVCL કચેરી બહાર ધરણા યોજી વિરોધ પ્રદર્શન કરી રહ્યા હતા. આ વિદ્યાર્થીઓ દિવસ-રાત એક જગ્યાએ બેસી કોઈને કોઈ રીતે સંઘર્ષનો સામનો કરી દિવસો પસાર કરી ન્યાયની વાટે બેઠા હતી. આજે NSUIની સાથે-સાથે કોંગ્રેસના નેતાઓ પણ આ વિદ્યાર્થીઓની વ્હારે આવી ધરણામાં જોડાયા હતા અને આજે પાંચમા દિવસે ભગવાન રામના ફોટા દર્શાવી વિરોધ નોંધાવ્યો હતો અને ન્યાયની માગ ભગવાન શ્રીરામ પાસે કરી હતી. હાલ પોલીસે તમામ લોકોની અટકાયત કરી છે.