પ્રધાનમંત્રી નરેન્દ્ર મોદી આગામી 25 તારીખના રોજ રાજકોટની મુલાકાતે આવી રહ્યા છે. તેમ પીએમ મોદી એઇમ્સથી રાજકોટ આવી જુના એરપોર્ટથી રેસકોર્સ સભા સ્થળ સુધી 800 મીટરના રૂટ પર ભવ્ય રોડ શો યોજવાના છે. રોડ શોના રૂટ પર કુલ 20થી વધુ સ્ટેજ તૈયાર કરવામાં આવશે. જેના પરથી ભાજપના અલગ-અલગ મોરચા તેમજ શૈક્ષણિક તેમજ સામાજિક સંસ્થાઓ દ્વારા પ્રધાનમંત્રીનું ભવ્ય સ્વાગત કરવામાં આવશે. જેમાં ગુજરાતના પ્રખ્યાત ગરબા, તલવાર રાસ, રબારી પહેરવેશ સાથે છત્રી ડાન્સ અને નાસિક ઢોલ સહિત વિવિધ અલગ-અલગ રંગો પ્રધાનમંત્રીને આવકારતા નજરે પડશે. ઉલ્લેખનીય છે કે, નરેન્દ્ર મોદી પીએમ બન્યા બાદ ત્રીજી વખત રાજકોટ શહેરમાં રોડ શો યોજી રહ્યા છે. આ અગાઉ વર્ષ 2017ની વિધાનસભાની ચૂંટણી પૂર્વે 29 જૂન 2017ના રોજ આજીડેમથી એરપોર્ટ સુધીનો રોડ શો યોજવામાં આવ્યો હતો. જે બાદ વર્ષ 2022માં પણ બીજી વખત એરપોર્ટથી રેસકોર્સ સુધી રોડ શો યોજ્યો હતો અને હવે ત્રીજી વખત 25 ફેબ્રુઆરીના રોજ રોડ શો યોજશે.
